Tæplega 100 manns mættu á morgunverðarfund Keystrike í gær en þar var meðal annars rætt um netárásir óvinveittra ríkja á innviði Vesturlanda.
Jóhann Páll Jóhannsson, umhverfis-, orku- og loftslagsráðherra, opnaði fundinn og lagði áherslu á mikilvægi þess að verja mikilvæga innviði gegn netárásum í breyttum heimi.
Hann benti á að á alþjóðavettvangi hafi áherslan færst frá orkuskiptum yfir í verndun innviða og tryggingu afhendingaröryggis raforku.
Sóley Kaldal, áhættustýringar- og öryggisverkfræðingur, fjallaði um þróun þjóðaröryggis á Íslandi og hvernig hefðbundin nálgun, byggð á landfræðilegri einangrun og friðelskandi sjálfsmynd þjóðarinnar, eigi ekki lengur við í stafrænum heimi.
Hún sagði stafræna innviði standa frammi fyrir miklum ógnum en jafnframt að Íslendingar væru í kjörstöðu til að standa framarlega á sviði netöryggis og að netvarnir gætu orðið mikilvægur þáttur sem framlag Íslands til varnarmála á heimsvísu.
Jack Fay, kapteinn í bandaríska sjóhernum og varnarfulltrúi í bandaríska sendiráðinu, sýndi fundargestum hvernig NATO og bandaríski herinn horfa á netöryggi og hið viðamikla hlutverk sem stafrænir innviðir gegna þegar kemur að samskiptum og stýringu varnarkerfa.
Dr. Ýmir Vigfússon, tæknistjóri Keystrike og dósent við Emory-háskóla í Bandaríkjunum, útskýrði hvernig óvinveitt þjóðríki nýta netárásir gegn lykilinnviðum á Vesturlöndum, hvaðan ógnirnar koma og þær fjölmörgu leiðir sem netþrjótar nota til að komast inn í tölvur og tölvukerfi.
Hann nefndi ríki á borð við Rússland, Norður-Kóreu, Íran og Kína, sem eru með skipulögð teymi netþrjóta sem oftar en ekki eru hluti af her viðkomandi landa til að brjótast inn í innviði annarra þjóða með það að markmiði að valda gríðarlegum skaða og glundroða.
Að lokum fjallaði Ýmir um helstu viðbrögð og varnir við þessum ógnum og kynnti netöryggislausn Keystrike, sem er einkaleyfisvarin og einstök á heimsvísu enda kemur hún í veg fyrir að tölvuþrjótar geti valdið skaða eftir að innbrot heppnast.
