Örn V. Kjartansson, framkvæmdastjóri Heklureits, segir staðhæfingar sem Bergur Þorri Benjamínsson hafi sett í færslu á Facebook um íbúð í Heklureit vera rangar.
Að sögn Arnar rýnir Bergur í grunnmynd „og dregur ályktanir út frá henni.“
Viðskiptablaðið greindi frá færslu Bergs Þorra en þar gagnrýndi hann hönnun og stærð íbúðarinnar. Örn segir þó staðhæfingar hans um stærð íbúðarinnar alrangar.
„Um er að ræða hagkvæma 68 fm íbúð (77 fm m/geymslu) sem er með tveimur svefnherbergjum en mikið ákall hefur verið eftir litlum þriggja herbergja íbúðum á markaðnum.
Til að stækka alrýmið í íbúðinni er gengið hvort sínu megin inn í herbergið sem þó er tæpir 12 fm að stærð með góðum skápum. Lengd fyrir hjónarúm er 2,23 metrar,“ segir Örn í svari til Viðskiptablaðsins.
Býður Bergi Þorra í heimsókn
Örn segir að þetta fyrirkomulag sé búið að vera víða í gangi á markaðnum og hefur reynst vel.
„Ungt fólk vill aukið alrými á kostnað ganga í herbergjum. Alhæfing Bergs um að íbúðin sé fyrir fólk 1,80 cm stenst því enga skoðun. Einnig uppfyllir salerni allar reglugerðir og er þar haganlega fyrirkomið með þvottavél og þurrkara,“ segir Örn.
„Ég vil bjóða Bergi Þorra velkominn í heimsókn á Heklureit og skoða þar haganlega hannaðar íbúðir fyrir ungt fólk,” bætir Örn við að lokum.
