GEVA ehf, félag Geirs Vals Ágústssonar, fjármálastjóra og eins eigenda Air Atlanta, hefur fest kaup á 290 fermetra þakíbúð við Austurhöfn á 505 milljónir króna. Íbúðin er ein sú dýrasta sem selst hefur hér á landi en hún er seld fokheld líkt og þrjár aðrar þakíbúðir við Austurhöfn.
Innangengt er inn í íbúðina beint úr lyftu en gert er ráð fyrir fimm herbergjum og þremur baðherbergjum í íbúðinni auk þess að tvennar svalir eru við íbúðina.
GEVA seldi nýverið aðra 199 fermetra íbúð í Austurhöfn neðar í byggingunni til félags í eigu Björgólfs Thors Björgólfssonar, á 310 milljónir króna. Sú var keypt fyrir tæpu ári á 265 milljónir króna. Þá á GEVA þriðju íbúðina í Austurhöfn sem er um 80 fermetrar.
Búið er að selja nær allar lúxusíbúðirnar við Austurhöfn, en þær eru 71 og nam ásett verð þeirra um 13 milljörðum króna í það heila þegar íbúðirnar fóru í sölu árið 2020.
Rekstur Atlanta hefur gengið vel í heimsfaraldrinum en Haru Holding, sem GEVA á 30% hlut í, hefur greitt út tæplega 13 milljarða í arð á síðustu tveimur árum. Hlutur GEVA í arðgreiðslum síðustu tveggja ára nemur því nærri fjórum milljörðum króna.
