Bandaríski samfélagsmiðillinn Facebook byrjaði á dögunum að bjóða Notendum í fjölmörgum Evrópulöndum, þar á meðal Íslandi, að nota sérstakt stefnumótaapp sitt. Eins og Viðskiptablaðið sagði frá á í sumarbyrjun 2018 hóf fyrirtækið að bjóða stefnumótaappið til notenda víða um heim og svo í Bandaríkjunum árið 2019.
Mark Zuckerberg stofnandi Facebook sagði þegar appið var kynt að það ætti að einblína á að hjálpa fólki að byggja upp raunveruleg langtímasambönd. Þó hefur appið fengið misvísandi dóma og verið sagt að það bæti litlu við önnur stefnumótaöpp.
- Sjá einnig: Finna ekki ástina
Appið er nú sagt þegar hafa leitt til 1,5 milljarða tenginga milli notenda í þeim 20 löndum sem það hefur verið í boði hingað til, en í því er búinn til aðskilinn notandaaðgangur frá hefðbundna Facebook aðganginum.
Aðalaðdráttaraflið er sagt vera að hægt er að merkja sig sem leynilega aðdáendur Facebook vina sinna sem ekki sjái það nema þeir geri það sama til baka. Einnig verður hægt að fara á stafrænt stefnumót í gegnum appið.
- Sjá einnig: Tinder vex þrátt fyrir innreið Facebook
Auk þess verður hægt að leita eftir mögulegum sameiginlegum áhugamálum með því að leita að tengingum innan hópa á Facebook, til að mynda eigendum ákveðinna gæludýra, eða sameiginlegum viðburðum sem notendur sækja. Jafnframt verður hægt að deila atburðum úr lífum notenda frá sögum á Facebook eða Instagram inn á stefnumótaaðganginn.
Þau lönd sem nú bætast við í appinu eru:
Austurríki, Belgía, Bretland, Búlgaría, Danmörk, Eistland, Finnland, Frakkland, Grikkland, Holland, Írland, Ísland, Ítalía, Króatía, Kýpur, Lettland, Litháen, Liechtenstein, Lúxemborg, Malta, Noregur, Portúgal, Pólland, Rúmenía, Svíþjóð, Slóvenía, Slóvakía, Spánn, Sviss, Tékkland, Ungverjaland og Þýskaland.
