Bandaríska tímaritið Forbes hefur tekið saman lista yfir hótel sem þykja þau bestu þegar kemur að því að halda brúðkaup. Hótelin á listanum eru fjölbreytt. Allt frá sveitahótelum með búfénað í næstu girðingu upp í þakbrúðkaup með útsýni yfir New York.
The Ferrington House Inn er í Norður Karólínu. Hótelið er fimm stjörnu lúxushótel þar sem brúðhjón eru gefin saman úti á engi og veislan haldin í fallegri hlöðu sem er skreytt hundruðum ljósa.
Fyrir þá sem vilja Hollywood glamúr er Bel-Air hótelið tilvalið. Hótelið er falið í hlíðunum rétt fyrir utan miðborg Los Angeles. Hótelið hefur fengið andlitslyftingu og er nútímalegt en um leið hefur tekist að halda í sjarmann sem einkenndi hótelið í gamla daga.
The Inn at Dos Brisas er góður kostur fyrir fólk sem vill sleppa við að hringja í blómasala því innkeyrslan að hótelinu er umkringd blómahafi. Rósagarðurinn á hótelinu er vinsæll fyrir athöfnina á meðan veislur fara gjarnan fram á fimm stjörnu veitingastað hótelsins.
