Anna Regína Björnsdóttir hefur tekið við starfi forstjóra Coca-Cola Europacific Partners á Íslandi. Hún tekur við af Einari Snorra Magnússyni sem kveður nú fyrirtækið eftir yfir tuttugu ára starf, þar af síðustu fimm árin sem forstjóri. Greint er frá þessu í fréttatilkynningu.
Anna Regína, sem er með M.Sc í iðnaðarverkfræði, hefur starfað hjá fyrirtækinu frá árinu 2012 í ýmsum stjórnunarstörfum. Síðustu þrjú ár hefur hún starfað sem framkvæmdastjóri sölusviðs en þar áður var hún framkvæmdastjóri fjármálasviðs.
„Coca-Cola á Íslandi er leiðandi fyrirtæki er varðar styrkleika vörumerkja, þjónustu við viðskiptavini, sjálfbærnimál og mannauðsmál. Fyrirtækið byggir á sterkum grunni og yfir 80 ára sögu á íslenska drykkjarvörumarkaðinum,“ segir Anna Regína, nýr forstjóri Coca-Cola á Íslandi.
„Það er mikill styrkur í vörumerkjunum okkar, bæði þeim alþjóðlegu sem eru með þeim stærstu á heimsmælikvarða en eins í íslenskum vörumerkjum, t.d. íslenskum gæðabjór sem bruggaður er hjá Víking Brugghús, verksmiðju okkar á Akureyri. Coca-Cola á Íslandi býr yfir öflugum mannauði og ég er þakklát fyrir að vera treyst fyrir því að leiða okkar frábæra starfsfólk inn í nýja tíma og takast á við spennandi verkefni í samstarfi við viðskiptavini okkar.“
Einar Snorri Magnússon hefur gegnt starfi forstjóra Coca-Cola á Íslandi frá árinu 2018 en hann óskaði nýverið eftir að fá að láta af störfum. Einar hóf störf hjá Vífilfelli 2001 og hefur gegnt ýmsum stjórnunarstörfum frá þeim tíma.
„Það eru bjartir tímar fram undan hjá fyrirtækinu; við erum nýbúin að starta nýrri framleiðslulínu í Reykjavík, það er kraftur í sölu- og markaðsstarfinu og jákvæð og stór skref hafa verið stigin í lækkun kolefnissporsins. Eftir mörg skemmtileg ár hjá Vífilfelli og Coca-Cola á Íslandi er þakklæti mér efst í huga til samstarfsfólks og viðskiptavina sem ég hef unnið með og kynnst í gegnum tíðina” segir Einar Snorri en hann mun vera nýjum forstjóra innan handar næstu vikurnar.
