Birgir Arnarson, framkvæmdastjóri áhættustýringar hjá Skaga, hefur ákveðið að láta af störfum hjá félaginu.
Samkvæmt tilkynningu frá félaginu hyggst Birgir hefja störf sem meðeigandi (e. partner) á ráðgjafasviði KPMG á Íslandi og Norðurlöndunum.
Birgir mun starfa hjá Skaga út apríl næstkomandi og verður í framhaldinu félaginu innan handar í nýju hlutverki, samkvæmt Skaga.
Birgir tók við starfinu í byrjun mars í fyrra en hann gegndi áður stöðu framkvæmdastjóra áhættustýringar (e. Chief Risk Officer) hjá PayPal Europe og yfirmanns lausafjárgreiningar hjá PayPal samstæðunni.
Birgir starfaði einnig sem yfirmaður markaðsáhættugreiningar (e. Head of Market Risk Analytics) á fjárfestingasviði alþjóðlega tryggingafélagsins Zurich.
Birgir er með doktorspróf í kennilegri og hagnýtri aflfræði frá Cornell-háskólanum í Bandaríkjunum. Hann er jafnframt með próf í verðbréfaviðskiptum.
