Orkusalan hefur ráðið Helgu Beck í starf markaðsstjóra hjá fyrirtækinu en hún kemur til Orkusölunnar með áralanga reynslu á sviði markaðsmála og stefnumótunar, auk öflugs bakgrunns í stafrænum lausnum og vefþróun.
Helga hefur síðustu fjögur ár starfað sem markaðs- og viðskiptaþróunarstjóri hjá Nóa Síríus þar sem hennar helstu verkefni voru meðal annars stefnumótun fyrir vörumerki fyrirtækisins og greining nýrra tekjulinda. Þar áður starfaði hún í tæp þrjú ár með innflutt vörumerki Nóa Síríus.
„Við erum spennt að fá Helgu til liðs við okkur. Hún er öflugur og dýrmætur liðsstyrkur, sem sést á því starfi sem hún hefur unnið fyrir Nóa Síríus. Þekking hennar mun styrkja Orkusöluna í vegferð okkar að vera framúrskarandi í markaðsstarfi og þjónustu, auk þess að efla sköpunargleði og skýra stefnu í öllu okkar starfi,” segir Heiða Halldórsdóttir, framkvæmdastjóri sölu- þjónustu og markaðssviðs Orkusölunnar.
Helga útskrifaðist með BS gráðu í viðskiptafræði frá Háskóla Íslands árið 2015 og þá lauk hún MS gráðu í brand & communications management árið 2018 frá Copenhagen Business School.
