Alþjóðlega flutningafyrirtækið Kuehne+Nagel hefur ráðið Jón Garðar Jörundsson sem framkvæmdastjóra fyrir starfsemina á Íslandi.
Jón Garðar kemur til Kuehne+Nagel með víðtæka reynslu úr viðskiptalífinu en hann starfaði áður meðal annars sem sviðsstjóri viðskiptasviðs hjá Faxaflóahöfnum sf. og sem framkvæmdastjóri viðskiptaþróunar hjá Arnarlaxi ásamt því að sitja í stjórn félagsins á árunum 2014-2015.
Hann er með MSc gráðu í fjármálum og fjárfestingum auk MBA gráðu frá Edinborgarháskóla.
Kuehne+Nagel, eitt stærsta flutningafyrirtæki heims, var stofnað árið 1890 og starfar á um 1.300 stöðum í yfir 100 löndum með yfir 79.000 starfsmenn. Fyrirtækið þjónar fjölbreyttum þörfum viðskiptavina um sérhæfðar flutningalausnir um allan heim.
„Ég er þakklátur fyrir þetta skemmtilega tækifæri og hlakka til að takast á við ný verkefni hjá Kuehne+Nagel og vinna með frábæru alþjóðlegu teymi að því að efla og byggja upp starfsemi fyrirtækisins á Íslandi,“ segir Jón Garðar Jörundsson.
