Frumvarp innviðaráðherra um Jöfnunarsjóð sveitarfélaga er nú statt í umhverfis- og samgöngunefnd Alþingis en frestur til að skila umsögnum við frumvarpið rann út fyrr í mánuðinum.
Sveitarfélögin hafa fagnað endurskoðun á kerfinu en gildandi regluverk hefur sætt gagnrýni þar sem það hefur reynst flókið og ógagnsætt. Eins og staðan er í dag veitir sjóðurinn tekjujöfnunarframlag, útgjaldajöfnunarframlag og framlag vegna lækkunar tekna af fasteignaskatti en nýtt jöfnunarframlag og nýtt líkan leysir þau framlög af hólmi.
Breytingarnar munu hafa talsverð áhrif á framlög til sveitarfélaganna að óbreyttu, ýmist til lækkunar eða hækkunar. Er þá ekki tekið tillit til skerðinga vegna vannýtingar útsvars. Alls hækka framlög til 22 sveitarfélaga en skerðast hjá 37.
Mest hækka framlög til Reykjavíkurborgar, eða um 400 milljónir króna, en miðað við íbúafjölda í byrjun árs 2025 nemur hækkunin 3 þúsund krónum á hvern íbúa. Hjá Reykjanesbæ hækka framlögin um 333 milljónir, eða 15 þúsund á íbúa, og 279 milljónir hjá Akureyrarbæ, eða um 14 þúsund á íbúa. Hjá Múlaþingi nemur hækkunin 261 milljón, eða um 50 þúsund á íbúa, og 212 milljónir hjá Árborg, eða um 18 þúsund á íbúa.
Mesta lækkunin er aftur á móti hjá Mosfellsbæ, eða um sem nemur 251 milljón króna, og þarf hver íbúi því að greiða 19 þúsund meira til sjóðsins. Lækkunin hjá Seltjarnarnesbæ nemur 247 milljónum, eða 54 þúsund á íbúa, og 218 milljónir hjá Garðabæ, eða um 11 þúsund á íbúa. Hjá Langanesbyggð, sem telur 540 íbúa, nemur lækkunin 174 milljónum króna.
Nokkur munur til eða frá birtist þegar frumvarpið sem kynnt var í samráðsgátt er borið saman við frumvarpið sem lagt var fram á Alþingi, mest hjá Mosfellsbæ til lækkunar um 145 milljónir og mest til hækkunar hjá Reykjanesbæ um 349 milljónir.
Nánar er fjallað um málið í Viðskiptablaðinu. Áskrifendur geta lesið fréttina í heild hér.
