Í könnun sem Gallup gerði fyrir Viðskiptablaðið á dögunum voru landsmenn spurðir út í þekkingu og skoðun á veiðigjöldum en samkvæmt könnunni telur aðeins tæplega fjórðungur landsmanna sig vita hversu hátt hlutfall af hagnaði fiskveiða sé greitt í veiðigjald.
Eins og staðan er í dag greiða sjávarútvegsfyrirtæki 33% af hagnaði fiskveiða í veiðigjald. Þegar spurt var hversu hátt hlutfall af hagnaði fiskveiða svarendur töldu að væri greitt í veiðigjald var meðaltalið meðal svarenda 22,8%. Alls töldu 7,8% að hlutfallið væri 40% eða hærra, 37,3% töldu það 30-39%, 17,3% töldu hlutfallið vera 20-29%, 21% taldi það vera 10-19%, og 16,6% töldu að hlutfallið væri 0-9%.
Af þeim sem sögðust vita hversu hátt hlutfall væri greitt í veiðigjald svöruðu 72% að þeir teldu að veiðigjaldið sem hlutfall af hagnaði væri á bilinu 30-39%. Aðeins 2% töldu að hlutfallið væri 40% eða hærra en 7% töldu það 0-9%, 14% töldu að það væri 10-19% og 5% töldu það vera 20-29%. Að meðaltali töldu svarendur sem svöruðu fyrstu spurningunni játandi að veiðigjaldið væri 27,9%.
Allt önnur staða er uppi á teningnum þegar horft er til svara þeirra sem svöruðu fyrstu spurningunni neitandi en aðeins um 18% töldu að hlutfall af hagnaði sem greitt er í veiðigjald væri á bilinu 30-39% á meðan 71% töldu það lægra en raun ber vitni. 22% svarenda töldu hlutfallið vera 0-9%, 25% töldu það 10-19% og 24% töldu það vera á bilinu 20-29%. Þá töldu 11% að hlutfallið væri 40% eða hærra. Að meðaltali töldu svarendur sem svöruðu fyrstu spurningunni neitandi að veiðigjaldið væri 20%.
Þá var marktækur munur þegar horft er til búsetu en svarendur utan höfuðborgarsvæðisins töldu að meðaltali að veiðigjaldið væri 25,2% en svarendur í Reykjavík töldu að jafnaði að gjaldið væri 22,7% og 20,3% í nágrannasveitarfélögum Reykjavíkur.
Nánar er fjallað um málið í Viðskiptablaðinu. Áskrifendur geta nálgast fréttina í heild hér.
