Í könnun sem Gallup gerði fyrir Viðskiptablaðið á dögunum voru landsmenn spurðir út í þekkingu og skoðun á veiðigjöldum en samkvæmt könnunni telur aðeins tæplega fjórðungur landsmanna sig vita hversu hátt hlutfall af hagnaði fiskveiða sé greitt í veiðigjald.
Þegar spurt var hversu hátt hlutfall af hagnaði fiskveiða þeir töldu að væri greitt í veiðigjald var meðaltalið meðal svarenda 22,8%. Eins og staðan er í dag greiða sjávarútvegsfyrirtæki 33% af hagnaði fiskveiða í veiðigjald.
Spurt var einnig hversu hátt hlutfall af hagnaði fiskveiða svarendum fannst eðlilegt að greitt væri í veiðigjald en að meðaltali fannst svarendum eðlilegt að hlutfallið væri 35,7%. Alls töldu 10,2% svarenda eðlilegt að veiðigjaldið væri 60% eða hærra, 22% fannst eðlilegt að það væri 50-59% og 10,6% fannst eðlilegt að hlutfallið væri 40-50%. Þá fannst 21,8% svarenda að gjaldið ætti að vera 30-39%, 20,6% fannst 20-29% eðlilegt hlutfall, og 14,9% fannst 0-19% eðlilegt.
Þegar horft er til einstaka hópa var aðeins marktækur munur þegar kom að fjölskyldutekjum. Að jafnaði fannst einstaklingum með lægstu tekjur og efri millitekjur eðlilegra að veiðigjaldið væri hærra, annars vegar 41,5% að meðaltali og hins vegar 37,7%, en þeim sem voru með neðri millitekjur og hæstu tekjur, annars vegar 34% og hins vegar 32,8%.
Rétt tæpur helmingur þeirra sem voru með lægstu tekjurnar taldi eðlilegt að veiðigjaldið væri 50% eða hærra, þar af 17% sem töldu eðlilegt að það væri 60% eða hærra. Á sama tíma töldu 27% eðlilegt að gjaldið væri 30% eða lægra.
Þá töldu 27% þeirra sem voru með hæstu tekjurnar eðlilegt að hlutfallið væri 50% eða hærra, þar af 9% sem töldu eðlilegt að það væri 60% eða hærra. Aftur á móti töldu 43% eðlilegt að gjaldið væri 30% eða lægra.
Grafið sem fylgdi fréttinni í upphafi var rangt. Búið er að laga það og er beðist velvirðingar á mistökunum.
Nánar er fjallað um málið í Viðskiptablaðinu. Áskrifendur geta nálgast fréttina í heild hér.
