Heildarkostnaður vegna kjarasamninga við kennara, sem undirritaðir voru í febrúar síðastliðnum, var að mati samningsaðila áætlaður 11,4 milljarðar króna árið 2025. Áætlað er að heildarkostnaðurinn verði orðinn 19,7 milljarðar króna árið 2027.
„Stærstan hluta hækkunarinnar má rekja til svokallaðrar virðismatsvegferðar, sem gert er ráð fyrir að nemi 7,3 milljörðum króna árið 2025 og verði 8,5 milljarðar króna árið 2027,“ segir í svari Daða Más Kristóferssonar fjármálaráðherra við fyrirspurn frá Ingibjörgu Isaksen, þingmanns Framsóknar, um kostnað ríkisins vegna yfirfærslu verkefna frá sveitarfélögum.
Fjármálaráðherra vekur athygli á á því að gera megi ráð fyrir að útsvarstekjur sveitarfélaga aukist í kjölfarið. Gróflega megi ætla að aukningin liggi á bilinu 1,7–2,9 milljarðar króna á ári.
Daði Már segir að ekki liggi fyrir upplýsingar um sundurliðun á aukningu launakostnaðarins eftir sveitarfélögum.
Þá séu ekki áform um sérstakar fjárveitingar úr ríkissjóði vegna nýgerðra kjarasamninga sveitarfélaga við kennara, sem gilda til 31. mars 2028.
Eftirlitsnefnd óskaði eftir gögnum
Eftirlitsnefnd með fjármálum sveitarfélaga (EFS) óskaði í apríl eftir upplýsingum frá sveitarfélögum um hver heildaráhrif kjarasamningsins, í krónum talið, séu umfram þær forsendur sem lagðar voru fram í fjárhagsáætlunum sveitarfélaga.
Jafnframt óskaði nefndin eftir upplýsingum um hvort sveitarfélögin ætli að bregðast sérstaklega við þessum kostnaðarauka og ef svo er, með hvaða hætti.
„Ljóst er að umræddar launahækkanir geta haft áhrif á fjárhagsáætlanir sveitarfélaganna fyrir árin 2025-2028 og hefur hagfræðingur Sambands íslenskra sveitarfélaga m.a. bent á að launakostnaður fyrir sveitarstjórnarstigið í heild muni líklega aukast um nær 8% á yfirstandandi ári í stað 6% líkt og áður var talið,“ segir í bréfi EFS.
