Tankurinn ehf., eigandi TGI Fridays veitingastaðarins í Smáralind og Grillhússins, var úrskurðaður gjaldþrota í vor en samkvæmt lögbirtingablaði lýstu kröfuhafar um 227,5 milljónum króna í þrotabúið.
Ekkert fékkst upp í lýstar kröfur. Eigendur Tanksins voru Jóhannes Birgir Skúlason og Helgi Magnús Hermannsson. Veitingastöðunum hefur ekki verið lokað og því má ætla að rekstrinum hafi verið haldið áfram undir öðru félagi.
Líkt og Viðskiptablaðið greindi frá tók Tankurinn við eignarhaldi Grillhússins ehf. um miðjan apríl í fyrra og urðu Jóhannes og Helgi nýir stjórnendur veitingastaða Grillhússins á Sprengisandi og Laugavegi 96.
Grillhúsið hefur að auki rekið veitingastað í Borgarnesi um nokkurra ára skeið en hópur fjárfesta undir forystu Örvars Bessasonar frestaði kaupum á Grillhúsinu í Borgarnesi í fyrra.
Í september var greint frá því að eigendur TGI Friday´s hefðu samið við veitingamanninn Elís Árnason um kaup á veitingastaðnum Sport & Grill og kaffihúsinu Adesso í Smáralind og hafa tekið við rekstri staðanna.
Þar var einnig greint frá því að til stæði að fjölga Friday‘s-stöðunum á Íslandi og breyta Grillhúsinu við Laugaveg í Friday‘s-veitingastað líkt og nú hefur gerst.
Samkvæmt síðasta ársreikningi Tanksins ehf. tapaði félagið 14,2 milljónum króna árið 2023. Félagið tapaði 18,1 milljón árið áður
Handbært fé félagsins í árslok 2023 var 25,4 milljónir króna og voru eignir bókfærðar á 76 milljónir. Eigið fé félagsins var neikvætt um 62,1 milljón og námu skuldir 138 milljónum.
Grillhúsið ehf. var áður í jafnri eigu Þórðar Bachmann og Hafsteins Hasler og velti 760 milljónum króna árið 2022, sem var 50% aukning frá árinu 2021 þegar veltan nam 505 milljónum.
Taprekstur var hjá Grillhúsinu á árunum 2019-2022, en þar á undan hafði félagið skilað hagnaði sjö ár í röð.
Eignir félagsins voru bókfærðar á 115 milljónir í árslok 2022. Skuldir námu 150 milljónum, þar af voru 47 milljónir í langtímaskuldir, og eigið fé var neikvætt um 35 milljónir.
