Sam­kvæmt svari dóms­málaráðherra við fyrir­spurn Bergþórs Óla­sonar, þing­manns Mið­flokksins, voru 42% allra fanga á Ís­landi 2024 með er­lent ríkis­fang.

Um er að ræða tölu­verða fjölgun þar sem árið 2019 voru er­lendir ríkis­borgarar 21% og 14% árið 2014.

Sam­kvæmt ráðu­neytinu hófu 218 er­lendir ríkis­borgarar af­plánun eða gæslu­varðhald í fangelsi árið 2024.

Árið 2024 af­plánaði að meðaltali 31 er­lendur ríkis­borgari fangelsis­refsingu á hverjum degi. Hinn 15. mars 2025 voru 32 er­lendir ríkis­borgarar í af­plánun í fangelsinu.

Hlut­fall er­lendra fanga hefur farið vaxandi á undan­förnum árum og vekur um­ræðu um brota­hegðun, máls­hraða og dvalar­skil­yrði út­lendinga sem gerast brot­legir við lög hér á landi.

Bergþór spurði einnig: Hversu margir er­lendir ríkis­borgarar sátu í gæslu­varðhaldi árið 2024 annars vegar og 15. mars 2025 hins vegar?

„Árið 2024 sátu að meðaltali 28 er­lendir ríkis­borgarar í gæslu­varðhaldi á hverjum degi. Sam­tals hófu 208 er­lendir ríkis­borgarar gæslu­varðhald það ár og af þeim voru 63 í gæslu­varðhaldi á grund­velli út­lendinga­laga. Hinn 15. mars 2025 sátu 37 er­lendir ríkis­borgarar í gæslu­varðhaldi í fangelsi, þar af voru fjórir í gæslu­varðhaldi á grund­velli út­lendinga­laga,” segir í svari ráðu­neytisins.

Sjá einnig
Meira en helmingur at­vinnu­lausra er­lendir ríkis­borgarar

Yfir allt árið 2024 voru 208 er­lendir ríkis­borgarar úr­skurðaðir í gæslu­varðhald saman­borið við 182 er­lenda ríkis­borgara árið áður.

Á sama tíma fjölgaði úr­skurðum einnig vegna ís­lenskra ríkis­borgara, en árið 2024 voru 90 ís­lenskir ríkis­borgarar úr­skurðaðir í gæslu­varðhald saman­borið við 59 árið 2023.

Alls voru 81.277 erlendir ríkisborgarar skráðir með búsetu hér á landi þann 1. maí síðastliðinn og fjölgaði þeim um 731 einstaklinga frá 1. desember 2024 eða um 0,9 prósent samkvæmtÞjóðskrá. 

Á sama tímabili fjölgaði íslenskum ríkisborgurum um 685 einstaklinga eða um 0,2 prósent. Íslenskir ríkisborgara eru alls 326.185.