Samkvæmt Kauphallartilkynningu Skaga hafa 246 starfsmenn samstæðunnar kaupréttarsamning sem ná til allt að 19.307.468 hluta á ári miðað við 100% nýtingu kauprétta.
Á aðalfundi VÍS (Skaga) í mars á þessu ári var stjórn félagsins veitt heimild til að samþykkja kaupréttaráætlun á grundvelli hennar kaupréttarsamninga við starfsfólk Skaga og dótturfélaga þess.
Kaupréttaráætlunin var síðar útfærð af stjórn Skaga og samþykkt af skattinum um miðjan október.
Samkvæmt áætluninni öðlast kaupréttarhafi rétt til að kaupa hlut í félaginu fyrir að hámarki 1.500.000 krónur einu sinni á ári í þrjú ár og fyrst að 12 mánuðum liðnum frá undirritun samnings.
Kaupverð er vegið meðalverð í viðskiptum með hlutabréf félagsins tíu viðskiptadaga fyrir samningsdag, sem er í dag eða 19,11 krónur á hvern hlut.
Dagslokagengi Skaga var 19,65 krónur í dag. Gengi félagsins hefur hækkað um rúm 18% á árinu.
