Advania í Bretlandi hefur gengið frá kaupum á öllu hlutafé upplýsingatæknifyrirtækisins Servium Limited í Bretlandi.
Samkvæmt fréttatilkynningu mun vöruframboð Advania í Bretlandi aukast eftir kaupin en með þessu er Advania að stækka núverandi endursölustarfsemi sína og auka möguleika sína á að veita viðskiptavinum heildstæðari þjónustu í Bretlandi og Evrópu.
Servium er einkarekið upplýsingatækniþjónustufyrirtæki sem sérhæfir sig í stýrðri þjónustu, hagræðingu upplýsingatækniinnkaupa og eignastýringu vélbúnaðar og hugbúnaðar.
„Núverandi viðskiptavinir Servium munu njóta góðs af umfangsmikilli tækni- og stafrænni umbreytingarþjónustu Advania. Kaupin gera Advania kleift að bjóða enn breiðara framboð á þjónustu, hugbúnaði og vélbúnaði og styrkja tengsl við leiðandi framleiðendur og dreifingaraðila í Bretlandi. Viðskiptavinir munu svo auðvitað halda áfram að njóta góðs af alhliða þjónustu Advania frá upphafi til enda,“ segir í fréttatilkynningu.
Hagnaður Advania á Íslandi nam 961 milljón króna í fyrra og jókst um 127 milljónir frá fyrra ári.
Tekjur námu 17,6 milljörðum og jukust um tæplega 1,5 milljarða. Stjórn félagsins leggur til að 900 milljónir verði greiddar í arð á þessu ári en í fyrra voru greiddar út 750 milljónir.
Sjóður í eigu Goldman Sachs keypti meirihluta í Advania árið 2021 en fyrirtækið hefur vaxið á ógnarhraða síðan þá. Á einu og hálfu ári frá kaupum Goldman Sachs keypti Advania tíu fyrirtæki og þrefaldaði starfsmannafjöldann.
