Lars Lyse, forstjóri danska hönnunarfyrirtækisins Bolia, segir að á bak við árangur sinn í viðskiptalífinu sé saga persónulegs uppgjörs, þrotlaus sjálfsskoðun og djúp ábyrgðartilfinning gagnvart lífinu.
Í viðtali við Børsen fer Lyse yfir vægast sagt óvenjulegt lífshlaup sitt og hvernig hann endaði sem forstjóri fyrirtækis með 27,5 milljarða króna veltu samkvæmt síðasta ársreikningi.
Þegar Lyse var ellefu ára gamall varð hann fyrir bíl á leið sinni í skólann. Áreksturinn kastaði honum 25 metra og hann lá með höfuðkúpubrot, lífshættulega slasaður.
Í þrjár mínútur var hann líflaus áður en sjúkraflutningamenn komu honum aftur til lífs. Þessi dramatíska reynsla varð hans eigin upphafspunktur.
„Ég var gjörsamlega brotinn, líkamlega og andlega, en eftir það varð ég óbugandi. Ef ég gat lifað þetta af, gat ég lifað hvað sem er af,“ segir hann.
Áfallið fylgdi Lyse þó í gegnum unglingsárin og upplifði hann tómarúm og gremju. Hann var klár í skóla en á heimilinu var lítið um peninga og ekkert skipulag. Hann gerðist innbrotsþjófur og stal bílum.
Hann segist ekki hafa verið með neina framtíðarsýn þangað til hann hjólaði fram hjá fallegu einbýlishúsi í Brabrand og sá í garðinum börn leika sér í vatnsstríði. Það var sólríkur dagur, grillað og hlæjandi foreldrar á veröndinni.
„Þetta var eins og auglýsing fyrir fjölskyldugildi og öryggi, eitthvað sem ég hafði aldrei sjálfur upplifað. Ég staldraði við, starði í gegnum limgerðið og hugsaði: Ef ég ætla að fá þetta, þarf ég að búa það til sjálfur.“
Þetta augnablik varð kveikja að lífsbreytingu. Hann hætti í glæpum og byrjaði að leita að leið út.
Vann ást fyrrverandi að nýju
Lars Lyse fór fljótt út á vinnumarkað. Fyrsta alvöru starfið fékk hann hjá Dansk Supermarked árið 1987, þá aðeins rétt rúmlega tvítugur. Þar lærði hann grundvallaratriði verslunar og rekstrar og komst að því að honum líkaði vel við að stjórna og skapa ferla. Hann vann sig upp sem deildarstjóri og starfaði þar í átta ár.
Næstu árin færði hann sig yfir til Ikea. Þar uppgötvaði hann kraftinn sem felst í alþjóðlegum vörumerkjum og menningu fyrirtækja. Hann lærði að halda jafnvægi milli staðbundins skynbragðs og hnattrænnar stefnu, kunnátta sem síðar varð kjarninn í umbreytingu Bolia.
Sem yfirmaður alþjóðlegra útibúa hjá Ikea bjó Lyse með fjölskyldu sinni í Belgíu.
En of mikil fjarvera og vinnuálag eyðilagði hjónabandið. Þáverandi eiginkona hans flutti aftur til Danmerkur með dætur þeirra en Lyse sat eftir með son sinn.
Ákveðinn í að vinna ást hennar aftur keyrði hann vikulega á milli landanna. Að lokum tókst honum að ná henni aftur en að þessu sinni var sambandið á hennar forsendum. Þannig hófst nýtt líf í Danmörku.
„Hústónlist læknar allt“
Árið 2005 tók Lyse við sem forstjóri Bolia, sem þá var lítil húsgagnaverslun með tíu starfsmenn og óljósa framtíð.
Strax í byrjun var tekin djörf ákvörðun: Allt vöruúrval skyldi endurhannað og stefnt skyldi að því að verða hreinræktað hönnunarhús, byggt á norrænum gæðum og skýrum stíl.
Í dag er Bolia alþjóðlegt lífsstílsmerki með verslanir um alla Evrópu og ársveltu upp á 1,43 milljarða danskra króna sem samsvarar um 27,5 milljörðum króna á gengi dagsins.
Samhliða störfum sínum sem forstjóri Bolia er Lyse plötusnúður og mikill áhugamaður um hústónlist. Þeir sem hafa heimsótt verslanir Bolia í Danmörku ættu að vita þetta endar hljómar hústónlist í þeim öllum.
„Hústónlist læknar allt,“ segir Lyse og brosir hlýlega að blaðamanni Børsen.
Að skrifa sjálfum sér bréf
Á hverju ári frá árinu 2008 hefur Lyse skrifað bréf til sjálfs sín, einlæg skilaboð um ótta, von, mistök og vonir.
Hann les þau aðeins einu sinni, ári síðar, og skrifar nýtt. Þau veita honum yfirsýn yfir eigin þroska og minna hann á að lífið er sambland vonar og óvissu, hugrekkis og breytileika.
Í skrifborðsskúffunni á heimili sínu geymir Lyse USB-lykil sem hann kallar „dauðakubbinn“.
Þar eru bréfin, lykilorð, fjárhagsupplýsingar – og skilaboð til ástvina ef eitthvað skyldi koma fyrir. Það snýst ekki um ótta, heldur ábyrgð og skýrleika.
„Ef þú vaknar einn daginn og þekkir ekki lengur sjálfan þig og því lífi sem þú lifir, þá er aðeins ein leið út: Breyttu um stefnu.“
