Samtök fyrirtækja í sjávarútvegi (SFS) segja að forsendur langtímakjarasamninga sem gerðir voru við sjómenn og landverkafólk í fyrra kunni að bresta ef kynntar fyrirætlanir ríkisstjórnar gangi eftir. Þetta kemur fram í yfirlýsingu SFS til fjölmiðla.

SFS gerði langtímakjarsamninga við Sjómannasamband Íslands (SSÍ), Sjómanna- og vélstjórafélag Grindavíkur (SVG), VM - Félag vélstjóra og málmtæknimanna (VM) og Félag skipstjórnarmanna (FS) í fyrra.

Stjórn SFS lýsir í yfirlýsingunni áhyggjum af rekstrarskilyrðum í sjávarútvegi og fyrirætlunum stjórnvalda um verulegar breytingar er lúta að atvinnugreininni.

„Aukning strandveiða, hækkun veiðigjalds, hækkun kolefnisgjalds og frekari takmarkanir á eignarhaldi þyngja verulega róðurinn. Sjávarútvegur keppir á útivelli í erfiðri alþjóðlegri samkeppni, við ríkisstyrktan sjávarútveg annarra þjóða, og hefur þar enga stöðu til þess að velta kostnaðarhækkunum heima fyrir út í verð afurða. Fram hjá þessari stöðu má ekki horfa.“

SFS segir að þrátt fyrir áherslu í orði á aukna verðmætasköpun lykilatvinnuvega í stefnuyfirlýsingu nýrrar ríkisstjórnar virðast fáar aðgerðir eða hugmyndir liggja þar að baki.

„Með því að vega að samkeppnishæfni atvinnugreinar sem leggur þung lóð á vogarskálar hagvaxtar og góðra lífskjara hér á landi er leiðin vörðuð að minni ávinningi samfélagsins af nýtingu sjávarauðlindarinnar.

Það er í þessu samhengi umhugsunarefni að langtímakjarasamningar hafa verið gerðir við bæði sjómenn og landverkafólk, í krafti þess að aukin verðmætasköpun og framleiðni geti staðið undir skuldbindingum samninganna. Þær forsendur kunna að bresta ef kynntar fyrirætlanir ríkisstjórnar ganga eftir.“

Ef kjarasamningum sjómanna, þ.e. skipstjóra, vélstjóra og háseta, verður ekki sagt upp gilda þeir út árið 2033. Samningar landverkafólks gilda svo út árið 2028.