Arnar Sigurðsson, eigandi Sante, furðar sig á því hvernig Hagstofan fer að því að reikna út áfengisneyslu Íslendinga þar sem engar opinberar upplýsingar séu fáanlegar frá stofnuninni um innflutning á áfengisvörum.
Hann segir í samtali við Viðskiptablaðið að allir þeir sem flytji inn vín skrifi inn tollskýrslur um innflutning og ættu því gögnin að vera fáanleg.
Úrskurðarnefnd um upplýsingamál kvað upp úrskurð í gær um að afgreiðsla Skattsins á beiðni Arnars um slík gögn teldist ófullnægjandi.
Hann hafði fyrr í þessum mánuði óskað eftir árlegum innflutningstölum sem og framleiðslutölum frá innlendum framleiðendum í lítrum, verðmæti og áfengisprósentu af öllum tollflokkum sem ná yfir bjór, léttbjór, léttvín, styrkt vín, sterkt vín, ávaxtabætt vín auk annarra tollflokka sem kæmu til greina.
Skatturinn svaraði Arnari og leiðbeindi honum að beina fyrirspurninni til Hagstofu, þar sem tollurinn héldi ekki utan um þær upplýsingar sem óskað væri eftir.
Arnar svaraði Skattinum og kvað að Hagstofan gæti ekki nálgast upplýsingarnar nema frá Skattinum.
„Ef þú hringir í Hagstofuna þá áttar þú þig á því að þeir vita ekkert hvernig þeir reikna þetta út. Þar að auki ef þú spyrð um afrit af gögnunum þá segjast þeir vera undanþegnir upplýsingalögum,“ segir Arnar.
Hann bendir á að Hagstofan sé opinber stofnun sem haldi utan um opinberar upplýsingar og að ekki sé um að ræða persónugreinilegar upplýsingar.
„Allt sem kemur frá Hagstofunni er bara ein stór þvæla. Ég hlustaði til dæmis á Sigurð Inga, þáverandi fjármálaráðherra, kvarta yfir því að það væri ekki hægt að vinna neinar fjárhagsáætlanir fyrir ríkið vegna þess að það væri aldrei hægt að stóla á þessar tölur frá Hagstofunni.“
Arnar minnist þess að Hagstofan hafi ekki getað reiknað út hversu margir Íslendingar væru á Íslandi, né hversu margir útlendingar byggju hér á landi. „Þeir hafa svo ítrekað þurft að gefa út leiðréttar mælingar á verðbólgu en enginn spyr, hvernig reiknið þið þetta út?“
Að hans mati ættu slík gögn, eins og gögn sem tengjast verðbólgu, að vera fáanleg úr opinberum gagnagrunni. Hann spyr hvers vegna opinber gögn ættu að flokkast sem einhvers konar hernaðarleyndarmál Hagstofunnar.
„Síðan kemur tollurinn með einhverjar endalausar langlokur um að það sé ekkert haldið utan um þessar tölur, að það sé ekki hægt að fletta þeim upp. Hvernig veit þá Hagstofan hversu mikið er flutt inn af áfengi til Íslands? Þetta er bara einhver sirkus fáránleikans.“
