Almennir fjárfestar í Bandaríkjunum eru farnir að endurmeta vægi stórra tæknifyrirtækja í eignasöfnum sínum eftir að markaðurinn náði sér á strik í kjölfar lægðar í apríl.
Þótt fyrirtæki á borð við Nvidia, Apple og Microsoft haldi áfram að vera meðal vinsælustu bréfa á markaði, benda gögn til þess að áhugi almennra fjárfesta sé að dvína.
Samkvæmt gögnum frá Vanda Research, sem The Wall Street Journal greinir frá, hefur hlutfall almennra fjárfesta af heildarfjármagni sem runnið hefur inn í þessi fyrirtæki dregist verulega saman, úr um 41% í byrjun apríl niður í 23% um miðjan júní.
Samhliða þessu sýna tölur frá Morningstar Direct að tæknisjóðir hafa fengið um 7,1 milljarð bandaríkjadala í hreint innflæði það sem af er ári.
Til samanburðar hafa alþjóðlegir hlutabréfasjóðir fengið tæplega 70 milljarða dala í nýtt fjármagn.
Þessi þróun endurspeglar vaxandi tortryggni meðal fjárfesta gagnvart verðmati hinna svokölluðu „Magnificent Seven“ – Alphabet, Amazon, Apple, Meta, Microsoft, Nvidia og Tesla.
Patricia Andrews, 60 ára frumkvöðull frá Kaliforníu, segir í samtali við Wall Street Journal að hún hafi nýlega selt megnið af eign sinni í tveimur tæknisjóðum eftir að þeir jöfnuðu sig á ný eftir lægðina í apríl.
„Mér finnst þau vera að missa dampinn. Ég hef grætt nóg og vil verja hagnaðinum í alþjóðlega sjóði í staðinn,“ segir hún.
Þó að ekki sé um stórfelldar sölur að ræða, virðist hluti fjárfesta leita í aðra og stöðugri fjárfestingakosti.
Sumir beina sjónum að alþjóðlegum hlutabréfum og minni fyrirtækjum, aðrir velja traustari geira eins og nauðsynjavörur og veitur.
Í sumum tilvikum eru fjárfestar einfaldlega farnir að draga í land vegna þess að verðmat stærstu tæknifyrirtækjanna þykir orðið of hátt miðað við vöxt og afkomuspár.
