Alvotech hefur hafið umfangsmikið hlutafjárútboð sem beinist að stofnanafjárfestum á Íslandi, í Svíþjóð og á alþjóðamarkaði. Útboðið felur í sér sölu á um 7,5 milljónum sænskra heimildarskírteina og hlutabréfa í félaginu, samkvæmt tilkynningu til Kauphallarinnar.
Sé tekið mið af gengi félagsins í Kauphöllinni á Íslandi er um 10,85 milljarða króna útboð að ræða.
Útboðið hófst í morgun og lýkur einnig í dag. Útboðið fer fram með tilboðsfyrirkomulagi en samkvæmt kauphallartilkynningu stefnir félagið að því að kynna niðurstöður áður en markaðir opna í Stokkhólmi á morgun.
Markmið útboðsins er að fjölga stofnanafjárfestum, ekki síst í Svíþjóð þar sem félagið var nýlega skráð á Nasdaq-markaðinn í Stokkhólmi, og styrkja þannig hluthafahóp félagsins.
Þá vonast Alvotech einnig til að aukið frjálst flot í Svíþjóð skapi betri viðskiptatækifæri með bréf félagsins.
Alvotech hyggst nota afrakstur útboðsins til að efla rannsóknar- og þróunarstarfsemi sína, einkum í Svíþjóð. Þá á fjármagnið einnig að nýtast í almennan rekstur og í tengslum við nýlega yfirtöku á rannsókna- og þróunareiningu sænska líftæknifyrirtækisins Xbrane.
Kaupendur geta valið um að fá afhent sænsk skírteini skráð á Nasdaq í Stokkhólmi eða íslensk hlutabréf skráð á Nasdaq á Íslandi.
Greitt verður í íslenskum krónum fyrir íslensk hlutabréf, miðað við gengi SDR í útboðinu og gengi sænsku krónunnar gagnvart íslensku á lokadegi útboðsins.
Í tengslum við útboðið hafa Alvotech og stjórnendur þess skuldbundið sig til að selja ekki frekari hlutabréf eða skírteini næstu 180 daga, nema með samþykki umsjónaraðila útboðsins, DNB Carnegie og Citi.
Sama gildir um stærstu hluthafana Aztiq Pharma Partners, Alvogen Lux Holdings og Celtic Holdings II Limited, þó með 90 daga binditíma.
Útboðið er undir stjórn DNB Carnegie og Citi, sem jafnframt gegna hlutverki söluaðila ásamt SEB og íslenska félaginu ACRO verðbréf hf. Fjöldi lögfræðistofa aðstoðar við framkvæmd útboðsins í nokkrum lögsögum, þar á meðal BBA/Fjeldco fyrir hönd Alvotech hér á landi.
Alvotech sótti tæplega 23 milljarða króna við hlutafjáraukningu í febrúar 2024 en gengið í því útboði var 2.250 krónur á hlut.
