Alvotech og Teva Pharmaceuticals, bandarískt dótturfélag Teva Pharmaceutical Industries Ltd. hafa ákveðið að auka samstarf sitt á sviði þróunar, framleiðslu og markaðssetningar á líftæknilyfjahliðstæðum.
Teva hefur jafnframt ákveðið að fjárfesta í víkjandi skuldabréfum Alvotech með breytirétti í hlutabréf, að andvirði 5,2 milljarðar króna miðað við núverandi gengi (40 milljónir Bandaríkjadala).
Samkvæmt tilkynningu frá Alvotech verður fjárfesting Teva nýtt til áframhaldandi lyfjaþróunar.
Teva og Alvotech vinna saman að því að tryggja tryggja markaðsleyfi í Bandaríkjunum fyrir AVT02, fyrirhugaða líftæknilyfjahliðstæðu með útskiptileika við Humira í háum styrk, sem var nýlega hafnað af Matvæla- og lyfjaeftirlit Bandaríkjanna (FDA).
Felur samkomulagið í sér aukna þátttöku Teva í undirbúningi fyrir væntanlega úttekt FDA á framleiðsluaðstöðu Alvotech, og er starfsfólk Teva til staðar til að veita ráðgjöf varðandi gæðaeftirlit og framleiðslu.
Núverandi samstarf Teva og Alvotech nær til til fjögurra annarra líftæknilyfjahliðstæða. Þar á meðal er AVT04, fyrirhuguð líftæknilyfjahliðstæða við Stelara en FDA er með umsókn félaganna tveggja fyrir AVT04 nú til afgreiðslu.
Unnið að lausn á athugasemdum FDA
Róbert Wessman, stjórnarformaður og forstjóri Alvotech, fagnar auknu samstarfi félaganna tveggja í fréttatilkynningu.
„Við vinnum markvisst að undirbúningi til að tryggja farsæla niðurstöðu úr úttekt FDA og erum að klára að leysa úr öllum athugasemdum sem fram komu frá eftirlitinu. Markmiðiðið er að koma líftæknilyfjahliðstæðum okkar sem fyrst í hendur sjúklinga í Bandaríkjunum.“
„Markmið Teva er að vera leiðandi á markaði fyrir líftæknilyfjahliðstæður og við leggjum sem fyrr áherslu á samstarfið við Alvotech,“ sagði Sven Dethlefs, framkvæmdastjóri viðskipta fyrir Teva í Norður-Ameríku. „Við erum bjartsýn á horfur fyrir nýju lyfin í samstarfinu og að þróun AVT02 og AVT04 muni skila góðum árangri.“
