Alvotech hefur lokið lokuðu útboði til stofnanafjárfesta á samtals 7.500.000 hlutum, annars vegar í sænskum heimildarskírteinum (SDR) og hins vegar í hlutabréfum, á genginu 1.320,83 íslenskar krónur fyrir hvert hlutabréf og 100 sænskar krónur fyrir hvert SDR. Heildarfjárhæð útboðsins var 750 milljónir sænskra króna, sem nemur tæplega 10 milljörðum íslenskra króna. Þetta kemur fram í fréttatilkynningu frá félaginu.
Gengi bréfa í útboðinu var ákvarðað með hröðuðu tilboðsfyrirkomulagi og umsjónaraðilar útboðsins voru DNB Carnegie og Citi en auk þeirra sáu Skandinaviska Enskildabanken (SEB) og ACRO verðbréf um að safna í tilboðsbækur. Verulegur áhugi var á útboðinu hjá stofnanafjárfestum, en mikill meirihluti þeirra voru sænskir og aðrir alþjóðlegir fjárfestar utan Íslands.
Það sé mat stjórnar félagsins að verðið endurspegli núverandi markaðsaðstæður sem og eftirspurn eftir SDR heimildarskírteinunum á Nasdaq Stockholm og hlutabréfunum á Nasdaq Iceland. Uppgjör á viðskiptunum fari fram með afhendingu á eigin hlutum Alvotech.
Andvirði af sölu bréfanna verði varið til að styrkja enn frekar þróun á nýjum hliðstæðum, einkum í Svíþjóð þar sem Alvotech hafi nýlega fest kaup á rannsóknaraðstöðu sænska félagsins Xbrane. Með því hyggist félagið auka enn verðmæti lyfja í þróun og nýta önnur tækifæri til vaxtar.
„Fjárfestar í útboðinu þurftu að velja á milli þess að fá afhent SDR heimildarskírteini sem skráð eru á Nasdaq í Stokkhólmi eða hlutabréf sem skráð eru á Nasdaq á Íslandi (ALVOIS). Fjárfestar sem óskuðu eftir að fá afhent hlutabréf greiða fyrir þau í íslenskum krónum, miðað við gengi SDR í útboðinu í sænskum krónum margfaldað með miðgengi sænskrar krónu gagnvart íslenskri krónu sem birt er af Seðlabanka Svíþjóðar á lokadegi útboðsins,“ segir í fréttatilkynningu.
Ráðist hafi verið í útboðið með það að markmiði að fjölga alþjóðlegum fjárfestum í hluthafahópnum, til að byggja ofan á nýlega skráningu á markað í Svíþjóð, auka veltu SDR heimildarskírteinanna og vera enn betur í stakk búið til að grípa tækifæri sem gefast til stækkunar á rannsóknar- og þróunarhluta félagsins.
Gert sé ráð fyrir að uppgjör viðskiptanna fari fram þann 10. júní nk.
Gefa ekki út eða selja án samþykkis næstu 180 daga
Félagið hafi skuldbundið sig, með hefðbundnum fyrirvörum, til að gefa ekki út, selja eða á annan hátt framselja eða ráðstafa viðbótar SDR, hlutabréfum eða öðrum verðbréfum útgefnum af félaginu án samþykkis DNB Carnegie og Citi, fyrir hönd SEB og ACRO, í a.m.k. 180 daga eftir að uppgjöri viðskipta vegna útboðsins er lokið.
Ráðgjafar víða að
DNB Carnegie Investment Bank AB og Citigroup Global Markets Limited voru umsjónaraðilar útboðsins og héldu einnig utan um tilboðsbók, og Skandinaviska Enskilda Banken AB og ACRO verðbréf hf. voru söluaðilar og tóku við tilboðum.
Cirio Advokatbyrå AB og Westerberg & Partners voru lögfræðilegir ráðgjafar félagsins í Svíþjóð, Arendt & Medernach SA eru lögfræðilegir ráðgjafar félagsins i Lúxemborg, BBA//Fjeldco annaðist lögfræðiráðgjöf á Íslandi og Cooley LLP voru lögmenn félagsins í Bandaríkjunum.
Linklaters Advokatbyrå og Linklaters LLP voru ráðgjafar umsjónaraðilanna og söluaðilanna í Svíþjóð og Bandaríkjunum.
