Alvotech kynnti í dag að lyfjastofnun Ástralíu hafi veitt Cipla Australia Ptyu Ltd markaðsleyfi fyrir AVT02, líftæknilyfjahliðstæðu við gigtarlyfið Humira (adalimumab) í háum styrk.
Líftæknilyfjahliðstæða Alvotech við Humira (adalimumab), sem er eitt söluhæsta lyf heims, er leyfð til markaðssetningar í Ástralíu í áfylltri sprautu og áfylltum lyfjapenna. Í Ástralíu verður líftæknilyfjahliðstæðan markaðssett undir heitunum Ciptunec og Ardalicip.
„Við erum afar ánægð að hafa hlotið markaðsleyfi í Ástralíu, eftir að lyfið hlaut markaðsleyfi og er þegar komið í sölu í fjölmörgum ríkjum Evrópu og í Kanada. Þar sem markmið okkar er að bæta aðgengi sjúklinga að hagstæðum líftæknilyfjum, fögnum við þessum áfanga,“ sagði Mark Levick, forstjóri Alvotech.
Þetta er fyrsta líftæknilyfjahliðstæðan í samstarfi Cipla og Alvotech sem hlýtur markaðsleyfi, en tilkynnt var um samning fyrirtækjanna í júlí 2019. Í nóvember 2020 bættu fyrirtækin samstarfi í Suður Afríku við fyrri samning og í janúar 2021 gerðu þau viðbótarsamning um samstarf í Ástralíu og Nýja Sjálandi, sem náði til fjögurra annarra líftæknilyfjahliðstæða sem Alvotech er með í þróun og geta nýst í meðferð við sjálfsónæmis-, augn- og beinsjúkdómum auk krabbameins.
