Arð­greiðslu­hlut­fallið hæst hjá Símanum

Nú er aðalfundarhrina skráðra félaga í Kauphöllinni þar sem hvert félagið á fætur öðru kynnir afkomu síðastliðins árs, en fyrirhugað er að greiða hluthöfum félaga á aðalmarkaði um 70 milljarða króna á þessu ári.

Af þeim félögum sem hafa samþykkt að greiða hluthöfum arð á árinu er arðgreiðsluhlutfallið hæst hjá Símanum, 34,8 prósent og hjá Origo, 16,2 prósent, en félögin seldu dótturfélögin Mílu og Tempo á tugi milljarða króna á síðasta ári.

Á eftir Símanum og Origo kemur Arion banki með 5,8 prósent arðgreiðsluhlutfall, Eimskip 5,5 prósent og Íslandsbanki með 5 prósent.

Arðgreiðsluhlutfall (e. dividend yield) lýsir ávöxtun hluthafa af fjárfestingu sinni í formi arðgreiðslna. Hlutfallið er reiknað sem arður á hlut í hlutfalli við verð hlutarins.

Snorri Jakobsson, greinandi hjá Jakobsson Capital, bendir á að arðgreiðslur fjármála- og tryggingarfélaganna séu lægri á þessu ári samanborið við síðasta ár. Þá séu miklar arðgreiðslur hjá fasteignafélögunum.

„Þar eru til dæmis hluthafar Eikar að fá 5,5% arðgreiðsluhlutfall og þar að auki eru arðgreiðslur fasteignafélaganna verðtryggðar. Frá sjónarhóli fjárfestis er það því í grunninn eins og að kaupa 5% verðtryggt skuldabréf, þar sem tekjur fasteignafélaganna eru tengdar við vísitölu neysluverðs.“

Nánar er fjallað um málið í Viðskiptablaðinu, sem kom út fimmtudaginn 30. mars. Áskrifendur geta lesið fréttina í heild hér.