Arion banki hagnaðist um 7,9 milljarða króna á þriðja ársfjórðungi sem er hækkun úr 6,1 milljarði á sama tímabili í fyrra.
Arðsemi eiginfjár var 16,1% á fjórðungnum sem er töluvert hærra en arðsemi hinna kerfislega mikilvægu bankanna.
Arðsemi Arion banka á fyrstu sex mánuðum ársins nam 10,2% sem var 2,8% undir arðsemiskröfum stjórnar bankans en eftir uppgjör þriðja ársfjórðungs fór arðsemi á fyrstu níu mánuðum ársins upp í 12,2%.
„Afkoma Arion banka á þriðja ársfjórðungi er góð og í samræmi við okkar áætlanir. Sérstaklega er ánægjulegt að sjá hve vel starfsemi Varðar trygginga gekk á fjórðungnum en um er að ræða einn besta ársfjórðung í sögu fyrirtækisins. Aðrir þættir í okkar kjarnastarfsemi gengu sömuleiðis vel og skila góðri afkomu. Óhætt er að segja að áhersla okkar á fjölbreytta fjármálaþjónustu og þar með fjölbreyttar tekjustoðir stuðli að ákveðnum stöðugleika í okkar starfsemi. Sem fyrr er eigin- og lausafjárstaða bankans sterk og vel yfir kröfum eftirlitsaðila,“ segir Benedikt Gíslason, bankastjóri Arion banka.
Vaxtamunur á vaxtaberandi eignum bankans var 3,1% á fjórðungnum sem er 0,1% hækkun á milli ára.
Samkvæmt bankanum var fjórðungurinn góður í þóknanastarfsemi sem skilaði 3,9 milljörðum króna sem er um 100 milljónum meira en á sama tímabili í fyrra. Þá átti tryggingarfélagið Vörður besta fjórðung í sögu félagsins og skilaði 1,7 milljarða króna hagnaði.
Eiginfjárhlutfall bankans (CAR-hlutfall) var 23,2% og hlutfall almenns eiginfjárþáttar 1 var 18,8% í lok september. Hlutföllin taka tillit til óendurskoðaðs hagnaðar fjórðungsins að teknu tilliti til væntrar arðgreiðslu, sem nemur 50% af hagnaði í samræmi við arðgreiðslustefnu bankans.
Eiginfjárhlutfall samkvæmt reglum Fjármálaeftirlits Seðlabanka Íslands var 22,8% í lok september og hlutfall eiginfjárþáttar 1 18,3%.
„Við höldum áfram að setja okkur í samband við viðskiptavini sem eru með íbúðalán sem eru að fara af föstum vöxtum til að fara yfir þá valkosti sem í boði eru til að lækka greiðslubyrði. Þetta er hópur sem hefur notið afar hagstæðra vaxta á tímabili hárra stýrivaxta en þarf nú að takast á við hærri greiðslubyrði. Ýmsir kostir eru í boði en að vissu leyti má segja að það sé uppi óheppileg staða því stýrivextir eru enn 9% á sama tíma og verðbólga hefur lækkað niður í 5,1%. Munurinn þarna á milli er of mikill sem leiðir til þess að raunvextir, og þar með verðtryggðir vextir, eru sögulega háir. Verðtryggð íbúðalán hafa verið það skjól sem mörg heimili hafa leitað í og því mikilvægt að stýrivextir haldi áfram að lækka svo raunvaxtastigið hér á landi lækki. Núverandi vaxtaumhverfi er þess valdandi að við erum varfærin í okkar niðurfærslum,“ segir Benedikt.
Um 18 milljarða hagnaður á árinu
Á fyrri árshelmingi nam hagnaður Arion banka 17,8 milljörðum króna sem er lækkun úr 19,5 milljörðum á sama tímabili í fyrra.
Sem fyrr segir var arðsemi eiginfjár 12,2% á fyrstu níu mánuðunum samanborið við 13,9% í fyrra.
Hreinar þóknanatekjur námu 11,2 milljörðum á fyrstu níu mánuðum ársins og drógust saman um 10,1% frá fyrra ári.
Rekstrarkostnaður hækkar um 10,4% samanborið við sama tímabil 2023 Efnahagsreikningur bankans hefur stækkað um 5,2% á árinu.
