Hagnaður af rekstri Íslandsbanka á þriðja ársfjórðungi nam 7,3 milljörðum króna og var arðsemi eigin fjár 13,2% á ársgrundvelli.
Mun það vera vel yfir spám greinenda en meðaltal sjö greininga áætlaði arðsemi bankans um 10,8% á þriðja ársfjóðungi.
Hreinar vaxtatekjur námu 11,8 milljörðum króna á þriðja ársfjórðungi 2024 og lækkuðu um 69 milljónir króna frá sama tímabili í fyrra. Vaxtamunur var 2,9%, sá sami og á þriðja ársfjórðungi 2023.
Hreinar þóknanatekjur jukust um 4,9% samanborið við þriðja ársfjórðung 2023 og námu samtals 3,6 milljörðum króna á fjórðungnum. Hreinar fjármagnstekjur námu 228 milljónum króna á þriðja ársfjórðungi 2024, samanborið við fjármagnsgjöld að fjárhæð 193 milljónir króna á tímabilinu í fyrra.
Kostnaðarhlutfall bankans var 41,4% á fjórðungnum sem er hækkun úr 39,0% á þriðja fjórðungi 2023.
„Rekstur Íslandsbanka á þriðja ársfjórðungi gekk vel og nam hagnaður 7,3 milljörðum króna og var arðsemi eigin fjár 13,2% á fjórðungnum, sem er yfir okkar fjárhagsmarkmiðum. Arðsemi eiginfjár á fyrstu níu mánuðum ársins var 10,9%, sem er einnig yfir fjárhagsmarkmiðum. Tekjur jukust um tæp 4% samanborið við sama ársfjórðung í fyrra og kostnaðarhlutfall var 41,4% á þriðja ársfjórðungi, og 44,2% fyrir fyrstu níu mánuði ársins, en markmið bankans er að það hlutfall sé undir 45%. Unnið hefur verið að straumlínulögun í rekstri með hagræðingu að leiðarljósi,“ segir Jón Guðni Ómarsson bankastjóri í uppgjörinu.
Eigið fé Íslandsbanka nam 223,4 milljörðum króna í lok ársfjórðungsins, samanborið við 224,7 milljarða króna í lok árs 2023.
Eiginfjárhlutfall var 23,4% samanborið við 25,3% í árslok 2023.
„Eignagæði eru áfram góð og hefur langvarandi hátt vaxtastig ekki haft teljandi áhrif á lánabók bankans, þó aðeins beri á auknum vanskilum á ótryggðum lánum, en heildarfjárhæð ótryggðra lána bankans er lítil í samhengi við heildarumfang útlána. Fregnir af þverrandi verðbólgu á haustmánuðum og vaxtalækkunarákvörðun Seðlabankans í byrjun októbermánaðar voru því góðar fréttir og gangi spár greiningaraðila eftir mun verðbólga halda áfram að hjaðna á komandi mánuðum, sem ætti að skapa rými til frekari vaxtalækkana Seðlabankans,“ segir Jón Guðni.
Útlán til viðskiptavina Íslandsbanka drógust saman um 2,5 milljarða króna á fjórðungnum, eða um 0,2% frá öðrum ársfjórðungi, og voru 1.274 milljarðar króna í lok þriðja ársfjórðungs.
Innlán frá viðskiptavinum jukust á sama tíma um 10,9 milljarða sem er um 1,2% milli fjórðunga. Innlán frá viðskiptavinum bankans námu 927 milljörðum króna í lok fjórðungsins.
„Við leggjum mikla áherslu á að efla fjárhagslega heilsu viðskiptavina okkar og nýtum til þess margvísleg verkfæri. Að undanförnu höfum við verið í samskiptum við viðskiptavini sem eru með lán þar sem komið er að vaxtaendurskoðun og verið viðskiptavinum innan handar í krefjandi vaxtaumhverfi. Þá mun bankinn áfram leggja mikla áherslu á fræðslu um fjármál til að tryggja að viðskiptavinir okkar séu vel upplýstir um þá kosti sem í boði eru,“ segir Jón Guðni.
Á pari á fyrstu níu mánuðum ársins
Hagnaður Íslandsbanka á fyrstu níu mánuðum ársins nam 18 milljörðum króna sem er á pari við hagnaðinn á sama tímabili í fyrra sem var 18,4 milljarðar.
Hreinar vaxtatekjur á fyrstu níu mánuðum ársins námu 36,4 milljörðum króna, sem er samdráttur um 1,3% á milli ára.
Hreinar þóknanatekjur drógust saman um 1,7% á milli ára og námu 10,3 milljörðum króna á fyrstu níu mánuðum ársins, samanborið við 10,5 milljarða króna á sama tímabili árið 2023.
Kostnaðarhlutfall bankans, leiðrétt fyrir stjórnvaldssektum, hækkaði úr 41,3% á fyrstu níu mánuðum ársins 2023 í 44,2% á fyrstu níu mánuðum ársins 2024.