Árni Oddur Þórðarson, forstjóri Marel, hefur óskað eftir því að láta af störfum frá og með deginum í dag en ástæðan mun vera vegna réttaróvissu sem skapast hefur vegna aðgerða Arion banka bankinn hefur leyst til sín hlutabréf Árna Odds í Eyri Invest, sem er leiðandi fjárfestir í Marel. Þetta kemur fram í tilkynningu frá Árna Oddi sem telur aðgerðina ekki í samræmi við langtímalánasamning sinn við bankann. Árni Oddur átti 18% hlut í Eyri Invest en eftir innlausn bankans á hann 13%.
„Ástæðan fyrir því að ég stíg til hliðar sem forstjóri Marels á þessum tímapunkti er sú réttaróvissa sem skapast hefur vegna aðgerða Arion banka sem eru hvorki í samræmi við samninga, lög né viðteknar venjur, en bankinn hefur leyst til sín hlutabréf mín í Eyri Invest, sem er leiðandi fjárfestir í Marel.
Arion banki greip til þeirra aðgerða þrátt fyrir að ákvæðum langtímalánasamnings míns við bankann hafi verið fullnægt af minni hálfu, en ég hef átt í viðræðum við bankann síðustu vikur, sem ég taldi vera í fullu trausti, og gekk svo langt að leggja allar mínar eigur undir til að tryggja að veðhlutfall lánsins næmi tvöfaldri fjárhæð í lánasamningi. Á síðustu stundu bætti bankinn við óaðgengilegum kröfum umfram skilmála lánasamnings, hafnaði innágreiðslu upp á 335 milljónir króna og kaus að leysa bréfin til sín frekar en að efna lánasamninginn. Bréfin leysti bankinn til sín á undirliggjandi virði eigna skv. lánasamningi 31.október, gjaldfelldi lánið en hefur enn ekki skilað umframvirði eigna,“ segir í tilkynningu Árna Odds.
FME tilkynnt um aðgerðina
Árni Oddur segir að aðgerð Arion banka hafi verið mótmælt af lögmönnum sínum og málið hafi verið kynnt Fjármálaeftirlitinu.
„Ásamt lögmönnum mínum mun ég nú einbeita mér að því að fá skýrleika í málið og að leysa úr þessari réttaróvissu.Til að lágmarka líkur á því að þessi staða sem upp er komin skaði Marel, sem mér er svo kært, hef ég ákveðið að stíga til hliðar sem forstjóri. Mér er ljúft að segja, að skarð mitt verður auðfyllt, þar sem Marel hefur á að skipa einstökum hópi hæfileikaríks starfsfólks. Ég mun gera allt til að ná farsælli lausn mála og vonast til að geta tekið þátt í framtíðar verðmætasköpun Marel sem hluthafi í félaginu.
Eftir stendur, að á þessum tímamótum er ég fullur þakklætis fyrir þann tíma sem ég hef leitt Marel. Ég deili skoðun erlendra greinenda sem meta hlutabréf félagsins verulega undirverðlögð og mæla sterklega með kaupum. Ég er óendanlega stoltur af því sem öflugur starfsmannahópur félagsins hefur áorkað saman og veit að Marel mun vaxa og dafna og halda áfram að leiða framþróun í matvælaframleiðslu í heiminum,“ segir í tilkynningunni.
Árni Sigurðsson nýr forstjóri
Í tilkynningu frá Marel kemur fram að stjórn félagsins féllst á starfslokin og tekur Árni Sigurðsson, sem gegnt hefur starfi aðstoðarforstjóra Marel, við starfi forstjóra tímabundið á meðan stjórn mun finna félaginu forstjóra til framtíðar.
„Árni Sigurðsson hefur starfað hjá Marel frá árinu 2014, fyrst sem yfirmaður stefnumótunar og þróunar, síðar framkvæmdastjóri stefnumótunar og stefnumarkandi rekstrareininga, og hefur síðastliðið ár gegnt stöðu aðstoðarforstjóra félagsins og leitt tekjusvið þess. Áður en hann gekk til liðs við Marel starfaði Árni hjá AGC Partners og Landsbankanum. Árni er með MBA gráðu frá Harvard Business School og BSc gráðu í iðnaðarverkfræði frá Háskóla Íslands,“ segir í tilkynningunni.
Árni Sigurðsson er bróðir Jóns Sigurðssonar, forstjóra Stoða, en Stoðir eru fjórði stærsti hluthafinn í Arion banka.
© Aðsend mynd (AÐSEND)
„Það er mér heiður að fá að leiða okkar frábæra teymi í Marel til áframhaldandi samstarfs við viðskiptavini okkar á heimsvísu," segir Árni Sigurðsson. „Í störfum mínum fyrir Marel hef ég unnið þvert á tekjusvið og rekstrareiningar félagsins í hartnær áratug og hef mikla trú á þeim tækifærum, tækni og mannauði sem Marel býr að til að umbreyta matvælaiðnaði á heimsvísu. Við höfum tekið mikilvæg skref í átt að betri árangri og við erum á réttri leið. Ég hlakka mikið til að starfa nánar með okkar frábæra starfsfólki, viðskiptavinum og öðrum hagaðilum á komandi vikum og varða veginn til áframhaldandi vaxtar.“
Í tilkynningunni frá Marel þakkar stjórn félagsins Árna Oddi fyrir hans mikilvæga framlag til vaxtar og velgengni Marel síðustu 10 ár sem forstjóri og þar áður sem stjórnarformaður í 8 ár.
„Skýr framtíðarsýn hans og metnaður fyrir því að umbreyta matvælaiðnaði á heimsvísu hefur verið leiðarljós í stefnu Marel. Stjórnin er ánægð að geta leitað til Árna Sigurðssonar til að taka tímabundið við hlutverki forstjóra og tryggja þannig samfellu í rekstri gagnvart viðskiptavinum og áframhaldandi sókn í samræmi við vaxtarstefnu félagsins. Hann hefur fullt traust stjórnar til að leiða Marel áfram á þeirri braut sem mörkuð hefur verið til frekari virðisaukningar,“ segir Arnar Þór Másson, stjórnarformaður Marel."
„Vegferð Marel verið ævintýri líkust"
Árni Oddur hefur verið forstjóri Marel síðastliðin 10 ár en þar áður var hann stjórnarformaður félagsins í 8 ár.
„Við faðir minn, Þórður Magnússon, komum inn í hluthafahóp Marel fyrir tæpum tuttugu árum og höfum verið leiðandi fjárfestar í Marel sem stærstu hluthafar í Eyrir Invest," segir í tilkynningunni sem Árni Oddur sendi frá sér í kvöld. „Á þessum tíma hefur vegferð Marel verið ævintýri líkust, félagið er heimsleiðtogi á sviði lausna, hugbúnaðar og þjónustu í matvælaiðnaði. Marel hefur vaxið frá því að vera með 700 starfsmenn og 130 milljónir evra í árlegar tekjur yfir í alþjóðlegt fyrirtæki með starfsstöðvar um allan heim, 7.500 starfsmenn og 1,7 milljarða evra í árlegar tekjur.
Á sama tíma hafa þjónustutekjur farið úr 10% í yfir 40% af heildartekjum. Marel er í fararbroddi í nýsköpun og sjálfbærni og hefur lagt lóð á vogarskálarnar til að umbylta matvælaframleiðslu í heiminum. Marel hefur verið fyrirmynd í viðskipta- og sprotaumhverfi á Íslandi og hefur stutt íslenskan sjávarútveg til aukinnar sjálfbærni og arðsemi,“ skrifar Árni.
„Hluthafar félagsins hafa notið góðs af þeim árangri sem náðst hefur, en árleg meðalávöxtun, þar á meðal hjá íslenskum lífeyrissjóðum og almenningi, hefur verið yfir 10%. Þó að síðasta ár hafi verið viðskiptavinum krefjandi vegna ytri aðstæðna, þá var unnið að öflugri viðspyrnu innan félagsins og sáust þess skýr merki í nýjasta uppgjöri félagsins þar sem kostnaðargrunnur hefur lækkað mikið, sjóðsstreymi er gríðarlega sterkt og greinendur á markaði eru sammála um að félagið sé verulega undirverðlagt.“
