Væntingar eru um að skuldabréfamarkaðir verði fjárfestum gjöfulir í ár eftir sögulega vont ár 2022.
Raunar var síðasta ár afar óvenjulegt þar sem bæði skuldabréf og hlutabréf lækkuðu almennt í verði.
WSJ bendir á að ávöxtunarkrafa tíu ára bandarískra ríkisskuldabréfa hafi lækkað á fyrstu dögum nýs árs, sem þýðir að verð skuldabréfa hækkar.
Í umfjöllun Bloomberg er bent á að hækkun á verði skuldabréfa í upphafi ársins sé skarpasta í upphafi árs á þessari öld.
Von um lækkandi verðbólgu og vísbendingar um að Seðlabanki Bandaríkjanna hægi á stýrivaxtahækkunum þykja renna stoðum undir batnandi horfur fyrir fjárfesta á skuldabréfamörkuðum.
Þó er vandrataður vegur fram undan fyrir Seðlabanka Bandaríkjanna enda ýtir lækkandi vaxtastig skuldabréfa undir frekari lántöku og þar með þenslu sem ýtt getur undir verðhækkanir.
Fréttin birtist í Viðskiptablaðinu sem kom út 19. janúar.
