Ásgeir Jónsson selabankastjóri telur of snemmt að ræða um að slaka á raunvaxtaaðhaldi Seðlabankans þrátt fyrir að verðbólguhorfur séu á réttri leið. Þetta kom fram á kynningarfundi Seðlabankans í morgun en peningastefnunefnd bankans lækkaði stýrivexti í morgun úr 9,0% í 8,5%.

„Ég held að það sé þörf á þéttu raunvaxtaaðhaldi til þess að áfram þrýsta hagkerfinu niður í jafnvægi. Þið bara sjáið það, við erum búin að vera beita mjög harðri peningastefnu núna í einhvern tíma. Það voru 9,25% stýrivextir í fjórtán mánuði og 8,5% eru náttúrulega mjög háir vextir þrátt fyrir allt. Það bara sýnir að einhverju leyti kraftinn sem er í kerfinu,“ sagði Ásgeir.

Peningastefna Seðlabankans fylgi efnahagshorfum hverju sinni og þar skipti þróun verðbólgunnar og verðbólguvæntingar miklu máli fyrir framhaldið.