Kennarar hafa verið í kjaradeilu við hið opinbera í vetur. Fyrir áramót voru verkföll í nokkrum skólum og nú eftir áramót hefur deilan verið í hnút.
Í vikunni lagði ríkissáttasemjari fram innanhústillögu og verði hún samþykkt jafngildir það nýjum kjarasamningi. Samninganefndir kennara annars vegar og ríkis og sveitarfélaga hins vegar hafa þar til klukkan 13 á morgun, laugardag, til að taka afstöðu til tillögunnar. Verði hún ekki samþykkti hefjast verkföll í nokkrum skólum strax eftir helgi.
Í viðtali í Viðskiptablaðinu er Sigríður Margrét Oddsdóttir, framkvæmdastjóri Samtaka atvinnulífsins, spurð út í kjaradeilu kennara og hvort hún hafi áhrif Stöðugleikasamningana, sem undirritaðir voru á almenna markaðnum á síðasta ári.
„Það hefur verið átakanlegt að fylgjast með kjaradeilu kennara,“ segir Sigríður Margrét. „Við vitum öll hversu miklu máli kennarar skipta samfélagið en samúð með verkfallsaðgerðum þeirra er takmörkuð. Í fyrsta lagi er búið að semja á stærstum hluta vinnumarkaðarins, í öðru lagi vakti skipulagning verkfalla þeirra á síðasta ári furðu og að síðustu hefur aukið fjármagn til menntamála alls ekki skilað sér í betri árangri nemenda.“
Sigríður Margrét segir að það blasi við öllum að menntakerfið sé í vanda og kjarasamningar kennara geti vissulega verið hluti af lausninni.
„Þar þarf hins vegar að horfa til þess að raunverulegar umbætur eigi sér stað í skipulagi og gæðum skólastarfsins. Það er nákvæmlega engin stemmning í samfélaginu fyrir launahækkunum án nokkurrar innistæðu sem vinna gegn markmiðum um stöðugleika, minni verðbólgu og lægri vexti. Við þekkjum allt of vel afleiðingarnar af því.“
Viðtalið við Sigríði Margréti var tekið áður en ríkissáttasemjari lagði fram innanhústillöguna.
Ítarlegt viðtal er við Sigríði Margréti í Viðskiptablaðinu, sem var að koma út. Áskrifendur geta lesið það í heild hér.
