Eiríkur Magnús Jensson, fjármálastjóri Kviku banka, segir að hluti af fjármögnuninni verði nýttur til að endurfjármagna starfsemi bankans í Bretlandi en samkvæmt greiningu Akkurs gæti slík endurfjármögnun aukið hreinar vaxtatekjur bankans til muna.

Kvika er með starfsemi í Bretlandi í gegnum félagið Ortus, sem er í fullri eigu bankans og sérhæfir sig í fasteignaveðlánum.

Lánabók Ortus nam um 40 milljörðum króna í lok fyrsta ársfjórðungs.

„Þetta eykur sveigjanleika okkar hvað Ortus varðar. Við höfum verið með fína fjármögnun þar, sem þótti góð á sínum tíma, en nú þegar bankinn er kominn með fleiri valkosti á skuldabréfamarkaði þá var mikilvægt að huga að endurfjármögnun,“ segir Eiríkur.

Samkvæmt greiningu Akkurs gæti þessi nýja fjármögnun lækkað vaxtakostnað Kviku um 150 til 400 milljónir króna á ársgrundvelli. Ekki liggja fyrir nákvæm kjör eldri fjármögnunar Ortus en Kvika hefur hingað til, fram á þetta ár, gefið út erlend skuldabréf með u.þ.b. 4,0% álagi á millibankavexti, aðallega í sænskum og norskum krónum.

Ef gert er ráð fyrir að fjármögnun Ortus sé á svipuðum kjörum þýðir það 1 til 2 prósentustiga lækkun sem myndi skila sér í verulegum sparnaði. Til samanburðar þýðir 1% lækkun á vaxtakostnaði vegna GBP-lána um 160 milljónum króna lægri árlegan kostnað.

Verði útgáfan að fullu nýtt til að endurfjármagna eldri og dýrari lán má því áætla að sparnaðurinn nemi 150 til 400 milljónum króna árlega. Til samanburðar námu hreinar vaxtatekjur Kviku 9,7 milljörðum króna árið 2024 og spá Akkurs fyrir árið 2025 gerir ráð fyrir 11,5 milljörðum króna í hreinar vaxtatekjur.

Eiríkur segir að evruútgáfan sé þó fyrst og fremst liður í að fjölga fjármögnunarkostum bankans.

„Við höfum á undanförnum árum gefið út hér heima í krónum og síðan á Norðurlöndunum í sænskum og norskum krónum. Það sem við vildum gera með þessu er að byrja að kynna Kviku fyrir fjárfestum á meginlandi Evrópu og í Bretlandi,“ segir Eiríkur

Ásamt því að endurfjármagna skuldir Ortis að hluta verður fjármagnið einnig nýtt í að bæta lausafjárstöðu bankans vegna yfirvofandi gjalddaga á eldri útgáfum.

„Það er gjalddagi á skuldabréfaútgáfu í sænskum og norskum krónum á næsta ári sem er samtals 27 milljarðar. Þannig að þetta stillir lausafjárstöðuna af fyrir það. Þetta styður síðan við okkar vegferð um að styrkja lánabók bankans og markmiðið okkar um að ná lánabókinni upp í 300 milljarða fyrir lok árs 2027,“ segir Eiríkur en Kvika banki kynnti þau áform á fjárfestadegi í nóvember síðastliðnum.

Áskrifendur geta lesið lengri umfjöllun um evruútgáfu Kviku banka hér.