Samtök fyrirtækja í fjármálaþjónustu (SFF) fagna framtaki nýrrar ríkisstjórnar um að óska eftir hugmyndum til hagræðingar í ríkisrekstrinum.
Í umsögn SFFer ríkisstjórninni bent á að verkefnið um rafrænar þinglýsingar, sem að mörgu leyti hefur tekist vel, hafi ekki verið fullklárað.
Rafrænar þinglýsingar urðu að veruleika hér á landi á árinu 2020 en alveg frá þeim tíma hafa verið uppi áform um að taka frekari skref í átt að fullri rafvæðingu veðlána og minnka notkun á pappírssjölum.
Samkvæmt SFF eru þau áform langt komin en frumvarp þess efnis var lagt fram á vorþingi árið 2023.
„Með frumvarpinu var lagður grunnur að setningu nýrra heildarlaga um rafrænar skuldaviðurkenningar sem er nýtt lánaform sem ætlað er að veita sambærilegt réttarfarslegt hagræði og skuldabréf, en samræmist betur rafrænni lánaumsýslu og þinglýsingu auk þess að stuðla að skilvirkni og einföldun viðskipta,” segir í umsögn SFF.
Á vefnum island.is segir m.a. um rafrænar þinglýsingar að markmið þeirra sé að bjóða fyrirtækjum upp á hraðvirka og sjálfvirka skráningu réttinda í þinglýsingabækur þegar þau vinna með fjármögnun og viðskipti fasteigna og ökutækja sinna viðskiptavina.
Lagt var mat á þjóðhagslegan ávinning í upphafi verkefnisins með eftirfarandi hætti:
„Þegar handvirkt vinnuframlag sýslumanna, lánveitenda og fasteignasala sem verður óþarft með tilkomu lausnarinnar er tekið saman er áætlaður ávinningur af notkun hennar metinn á bilinu 1,2–1,7 milljarðar króna á ári. Ofan á það bætist svo ávinningur af því að ekki þarf að ferðast með pappírsskjöl á milli aðila og aukinn hraði viðskipta fyrir lánveitendur og fasteignasala.”
SFF bendir á að sé tekið tillit til almennra verðlagshækkana frá því matið var unnið til viðbótar við ávinning af sparnaði í ferðatíma og öðru hagræði fyrir einstaklinga, fyrirtæki og ýmsa opinbera aðila megi ætla að þjóðhagslegur sparnaður sem af lagabreytingunni kann að verða kunni að verða þó nokkuð meiri en þær fjárhæðir sem nefndar eru hér að framan.
Að mati SFF er auðsótt tækifæri til þess að ná fram enn frekari ávinningi með því að ljúka við fyrirliggjandi áform stjórnvalda um lagasetningu um rafrænar skuldaviðurkenningar.
Í frumvarpinu sjálfu segir: „Verði frumvarpið að lögum mun það einkum hafa áhrif á almenning, lánveitendur og opinbera aðila. Byggt er á því að umtalsverður samfélagslegur ávinningur felist í notkun rafrænna skuldaviðurkenninga í stað lánaskjala á pappírsformi, m.a. fyrir lántaka, fjármálastofnanir, fasteignasölur og sýslumannsembætti, þar á meðal vegna minni tilkostnaðar við umsýslu pappírsskjala.”
Hægt er að lesa umsögn SFFhér.
