Í júní voru 2.502 íbúðir í byggingu í Reykjavíkurborg, samkvæmt nýjustu talningu HMS á íbúðum í byggingu. Það samsvarar tæplega 10% aukningu frá því í mars síðastliðnum þegar 2.283 íbúðir voru í byggingu.
Meirihluti íbúðanna eru á fyrri framvindustigum en um 60% þeirra eru ekki orðnar fokheldar, að því er kemur fram í tilkynningu á vef HMS.
Í júní voru 2.502 íbúðir í byggingu í Reykjavíkurborg, samkvæmt nýjustu talningu HMS á íbúðum í byggingu. Það samsvarar tæplega 10% aukningu frá því í mars síðastliðnum þegar 2.283 íbúðir voru í byggingu.
Meirihluti íbúðanna eru á fyrri framvindustigum en um 60% þeirra eru ekki orðnar fokheldar, að því er kemur fram í tilkynningu á vef HMS.
Frá því í mars er búið að hefja framkvæmdir á 429 íbúðum í Reykjavíkurborg. Meðal stærri verkefna er uppbygging við Eirhöfða 1, þar sem 139 íbúðir eru í byggingu, og við Gjúkabryggju 10-14, þar sem 103 íbúðir eru í byggingu.
Í póstnúmeri 105 eru flestar íbúðir í byggingu eða 571 talsins og má þar helst nefna uppbyggingu á Orkureitnum og Heklureitnum.
![](http://vb.overcastcdn.com/images/135499.width-1160.png)
Þrjú sveitarfélög uppfylltu íbúðaþörf síðasta árs
Á síðasta ári var áætluð þörf fyrir 2.562 íbúðir á höfuðborgarsvæðinu samkvæmt húsnæðisáætlunum sveitarfélaganna. Aðeins 2.069 íbúðir voru fullbúnar í fyrra.
Samkvæmt HMS náðu aðeins þrjú sveitarfélög á höfuðborgarsvæðinu að uppfylla þörf með nýjum fullbúnum íbúðum en það voru Garðabær, Hafnarfjarðarkaupstaður og Seltjarnarnesbær.
Samkvæmt endurskoðuðum húsnæðisáætlunum fyrir árið 2024 er áætluð þörf fyrir 2.494 íbúðir á höfuðborgarsvæðinu í ár. Það sem af er ári eru nýjar fullbúnar íbúðir á höfuðborgarsvæðinu 953 talsins sem er um 38% af áætlaðri íbúðaþörf þegar árið er u.þ.b. hálfnað.