Gengi Bandaríkjadals gagnvart íslensku krónunni hefur veikst nokkuð hraustlega undanfarið og stendur þegar þetta er skrifað stendur miðgengi dals á móti krónu í 125,78. Líkt og gefur að skilja hefur þetta neikvæð áhrif á samkeppnishæfni íslenskra útflutningsgreina.

Bogi Nils Bogason, forstjóri Icelandair, segir Bandaríkjamarkað ekki aðeins mikilvægan fyrir Icelandair heldur íslenska ferðaþjónustu í heild sinni og þar af leiðandi íslenskt hagkerfi. Þegar dalurinn veikist gagnvart krónunni þýði það að samkeppnishæfni Íslands sem áfangastaður fyrir bandaríska ferðamenn versni.

„Því þurfum við í ferðaþjónustunni og stjórnvöld að gera allt sem í okkar valdi stendur til að tryggja samkeppnishæfnina að öðru leyti. Mikilvægt er að ekki sé gripið til aðgerða sem hafa enn neikvæðari áhrif á samkeppnishæfnina. Þvert á móti þarf að efla samkeppnishæfni íslensku ferðaþjónustunnar, sem er ein af stoðum íslensks hagkerfis. Það er því mikilvægt að stjórnvöld hafi það í huga í öllum sínum áformum og aðgerðum,“ segir Bogi og vísar þar til áforma ríkisstjórnarinnar um aukna gjaldtöku og álögur á ferðaþjónustufyrirtæki.

„Löndin í kringum okkur sem við eigum í samkeppni við og bjóða að mörgu leyti upp á svipaða „vöru“ og við, á borð við Noreg, eru að setja verulegar fjárhæðir í markaðsstarf til að vekja athygli á sínum áfangastöðum. Stjórnvöld á Íslandi eru því miður ekki að gera það. Það er mikilvægt að við vinnum á móti þessu og styrkjum samkeppnishæfni þeirra þátta sem við höfum stjórn á, í stað þess að gera stöðuna enn verri.“

Þó að umræðan sé oft á þá vegu að ferðaþjónustan skili litlu til þjóðarbúsins sé veruleikinn annar. „Skattspor íslenskrar ferðaþjónustu er gríðarstórt, eða um 200 milljarðar króna á ári. Ferðaþjónustan er því nú þegar að skila miklum fjármunum í ríkissjóð . Það er veruleg hætta á því, hvernig sem þessi aukna gjaldtaka og skattlagning verður útfærð, að heildartekjur ríkissjóðs af ferðaþjónustunni muni minnka. Ef samkeppnishæfnin minnkar enn frekar hefur það vitaskuld áhrif á eftirspurnina og tekjurnar verða minni. Það segir sig sjálft.“

Þannig myndu áform stjórnvalda um auknar tekjur í ríkiskassann snúast upp í andhverfu sína. „Við höfum séð dæmi þess erlendis frá að þegar stjórnvöld hækka eða setja á nýja skatta tengda ferðaþjónustu hefur það raungerst sem við höfum varað við. Samkeppnishæfnin skerðist, tekjur dragast saman og stjórnvöld þurfa því að lokum að stíga skrefið til baka.“

Nánar er fjallað um málið í Viðskiptablaðinu. Áskrifendur geta lesið fréttina í heild hér.