Ferðaskrifstofan FERIA hagnaðist um 98 milljónir króna árið 2023. FERIA býður sérhæfða þjónustu fyrir einstaklinga, stofnanir og fyrirtæki með sérstaka áherslu á viðskiptaferðir. FERIA er dótturfélag Icelandair Group.
Viðskiptadeild FERIA hefur vaxið jafnt og þétt samhliða því að fyrirtæki og stofnanir eru í auknum mæli að leita hagkvæmari leiða við skipulagningu viðskiptaferða.
Ferðaskrifstofan VITA var rekin af FERIA allt til ársins 2022 en þá varð VITA partur af Icelandair og nefnist í dag Icelandair VITA. Icelandari VITA sérhæfir sig í pakkaferðum eins og t.d. borgarferðum, sólarferðum, golf-, skíða- og hópaferðum ásamt siglingum og sérferðum.
Breytingin var einnig svar við aukinni eftirspurn frá fyrirtækjum og stofnunum eftir aukinni þjónustu og áreiðanleika í viðskiptaferðum.
„Við ákváðum að ferðaskrifstofan FERIA væri því með áherslu á viðskiptaferðir. Hefur þessi stefnumörkun skilað góðum árangri og við höldum áfram að byggja upp og mæta óskum okkar viðskiptavina,“ segir Soffía.
Mætum þörfum fólks
„Við erum búin að vera starfandi í 15 ár og höfum við ávallt verið með áherslu á framúrskarandi þjónustu í viðskiptaferðum og fyrirtækjaþjónustu,“ segir Soffía.
„Við erum í eigu Icelandair Group en störfum sem sjálfstæð eining með okkar eigin IATA númer. Við erum með samning við öll helstu flugfélög í heiminum og leggjum áherslu á að finna bestu og hagkvæmustu leiðir fyrir okkar viðskiptavini. Við veitum einstaklingum og fyrirtækjum alhliða þjónustu við bókun á flugferðum með samninga við helstu flugfélög í heimi.“
Soffía segir að stofnanir og fyrirtæki leiti til FERIA í auknum mæli í stað þess að starfsmenn séu sjálfir að bóka.
„Breytingar á viðskiptaferðum eru tíðar og oft er skammur fyrirvari til að aðlaga flugbókun að þörfum þeirra sem eru á ferðinni vegna viðskiptaerinda. Raunin er einnig sú að flugáætlanir hjá flugfélögum breytast stundum og raskanir verða á brottfarar- og komutímum. Einnig hafa ferðir til Asíu og Afríku aukist þar sem þörf er á tengiflugi og samsetningu fleiri en eins flugfélags. Þetta gerir það að verkum að einfaldara, þægilegra og ódýrara er að ferðaskipuleggjandi komi að og annist utanumhald á bókunum. Við hjá FERIA leggjum því upp með að mæta þörfum fólks, fyrirtækja og stofnana, sem eru í viðskiptaerindum. Við erum með 24 tíma þjónustu allan ársins hring í okkar fyrirtækjaþjónustu.“
Nánar er fjallað um málið í blaðinu Fyrirmyndarfyrirtæki í rekstri, sem fylgir Viðskiptablaðinu. Blaðið er opið öllum og hægt er að skoða það hér.