Bandaríkjadalur féll verulega í gær og nálgaðist þriggja ára lágmark í kjölfar slakra hagvísa og vaxandi áhyggja fjárfesta af stöðugleika ríkisfjármála í Bandaríkjunum.
Gengi dollarsins lækkaði um 0,7% gagnvart helstu gjaldmiðlum viðskiptalanda. Á sama tíma jókst þrýstingur á bandarísk ríkisskuldabréf og ávöxtunarkrafa 30 ára ríkisskuldabréfa hækkaði í 4,97%.
Upphaf veikrar stöðu dollarsins má rekja til niðurstaðna úr svokallaðri ISM-könnun um ástand framleiðslugeirans, samkvæmt Financial Times.
Vísitalan þar mældist 48,5 í maí sem erundir 50-stiga markinu, sem skilur á milli vaxandi og minnkandi starfsemi.
Þetta var fjórða lækkunin í röð og gefur vísbendingar um að viðskiptastefna Bandaríkjanna sé farin að draga úr hagvexti.
„Gögnin gefa vísbendingar um að tollaumhverfið sé farið að hafa áhrif á hagvöxt,“ segir Gordon Shannon, sjóðsstjóri hjá TwentyFour Asset Management.
Francesco Pesole, gjaldmiðlasérfræðingur hjá ING, sagði könnunina auka þrýsting á Bandaríkjadal sem þegar væri veikur og bætti við að dræm eftirspurn eftir bandarískum ríkisskuldabréfum og endurvakning viðskiptadeilna bættu gráu ofan á svart.
Áhyggjur af vaxtandi skuldabyrði Bandaríkjanna hafa einnig haft áhrif á fjárfesta.
Jamie Dimon, forstjóri JPMorgan Chase, varaði nýverið við því að bandaríski skuldabréfamarkaðurinn gæti „brostið“ undan þunga ríkisskulda.
Fjármálaráðherra Bandaríkjanna, Scott Bessent, reyndi að bregðast við með því að lýsa því yfir að Bandaríkin myndu „aldrei lenda í greiðslufalli“ en markaðir tóku varlega í þær fullyrðingar.
Á sama tíma tilkynnti Donald Trump um nýja 50% innflutningstolla á stál og ál – tvöfalt hærri en áður höfðu verið í gildi. Þessi tollar eiga að taka gildi 4. júní.
Í kjölfarið rauk álverð upp og svæðisbundið álverð í miðvesturríkjum Bandaríkjanna hækkaði um 54%.
Stálverð hækkaði um 14% og hlutabréf í bandarískum stálfyrirtækjum á borð við Nucor og Steel Dynamics jukust um rúmlega 10%.
