Evrópskir bankar hafa greitt meira en 1,1 milljarð evra í starfslokagreiðslur til háttsettra stjórnenda frá árinu 2018, samkvæmt greiningu Financial Times á opinberum gögnum og ársreikningum sjö stærstu fjármálastofnana Evrópu.
Greiðslurnar náðu til um 2.100 svokallaðra „material risk takers“ en það eru starfsmenn sem gegna lykilhlutverki í áhættustýringu og ákvarðanatöku. Meðaltalsgreiðsla við starfslok nam rúmlega 540.000 evrum á hvern einstakling, sem samsvarar 77,5 milljónum króna.
Stærstu greiðslurnar hjá Deutsche, HSBC og Santander
Þrír bankar, Deutsche Bank, HSBC og Santander, greiddu samanlagt um 850 milljónir evra, sem er meirihluti heildarupphæðarinnar. Hinir fjórir, Société Générale, BNP Paribas, Barclays og UBS, greiddu samanlagt 275 milljónir evra.
Santander greiddi hæstu meðalupphæðina til stjórnenda, eða 780.000 evrur, en hæsta einstaklingsgreiðslan var 11,2 milljónir evra og kom einnig frá Santander árið 2021. Um er að ræða 1,6 milljarða íslenskra króna á gengi dagsins.
Deutsche Bank greiddi tvær slíkar greiðslur, hvor um sig að upphæð 11 milljónir evra, árin 2018 og 2019.
Greiðslurnar endurspegla víðtækar breytingar og hagræðingu innan evrópska bankakerfisins.
Deutsche Bank hefur sérstaklega beint sjónum sínum að því að fækka í efstu lögum og hefur rekið 685 starfsmenn sem flokkast sem „material risk takers“ frá árinu 2018, sem er um 70% fleiri en HSBC, sem rekið hefur 400 slíka starfsmenn á sama tímabili.
Árið 2019 hóf Deutsche umfangsmikla endurskipulagningu með það að markmiði að fækka starfsfólki úr 92.000 í 74.000 fyrir árið 2022. Í lok árs 2021 hafði fjöldinn lækkað í 83.000, en síðan þá hefur hann vaxið á ný og nálgast nú aftur 90.000.
HSBC hefur einnig gengið í gegnum endurskipulagningu síðustu ár.
Fyrrverandi bankastjóri, Noel Quinn, stefndi að því að skera niður 35.000 störf og spara 4,5 milljarða dala árlega.
Arftaki hans, Georges Elhedery, kynnti nýtt skipurit haustið 2024 og hefur bankinn nú ákveðið að loka lykildeildum fjárfestingarbankans í Evrópu og Bandaríkjunum.
Barclays og UBS með hóflegar greiðslur
Barclays hefur farið aðra leið með árlegum, minni uppsagnahrinum og er nú að fækka um 200 störfum í fjárfestingarbanka sínum, svipað og árið áður.
UBS, sem greiddi lægstu starfslokagreiðslurnar til stjórnenda, greiddi samtals 643,7 milljónir evra til næstum 5.700 starfsmanna við samruna við Credit Suisse árið 2024. Meðaltalsgreiðslan þar var aðeins 129.000 dollarar á mann.
