„Bara góðir kostir í boði“

Fjárfestingarfélagið Eyrir Invest, einn stærsti hluthafi JBT Marels, hefur boðað til hlut­hafa­fundar í febrúar þar sem farið verður yfir stöðu félagsins í kjölfar samruna Marels og JBT og kynntar verða til­lögur stjórnar um fram­haldið.

Friðrik Jóhannsson, stjórnarformaður Eyris, segir í samtali við Viðskiptablaðið að ekki sé tímabært að upplýsa um tillögur stjórnar að svo stöddu en þær verði kynntar fyrir hluthöfum á fundinum.

Eyrir sendi frá sér tilkynningu rétt fyrir hádegi í dag þar sem upplýst var um að félagið hefði gert upp allar skuld­bindingar við lán­veit­endur og sé nú skuld­laust.

Fjárfestingarfélagið, sem var stærsti hluthafi Marels með 24,7% hlut, á í dag 6,6% hlut í JBT Marel Corporation sem ætla má að sé í kringum 62 milljarðar króna að markaðsvirði. Eignarhlutur Eyris í JBT Marel samsvarar um 90% af eignum fjárfestingarfélagsins.

Spurður hvort það komi til greina að greiða út eignarhlut Eyris í JBT Marel til hluthafa, svarar Friðrik að allir kostir verði skoðaðir en á endum sé það hluthafanna að ákveða framhaldið.

Meðal stærstu hluthafa Eyris eru feðgarnir Þórður Magnússon og Árni Oddur Þórðarson. Þá á Landsbankinn 14,2%, LSR 14,2% hlut og Lífeyrissjóður verzlunarmanna (LIVE) 11,3% hlut.