Peningastefnunefnd Seðlabanka Íslands hefur ákveðið að hækka stýrivexti bankans um 0,5 prósentustig. Meginvextir bankans, vextir á sjö daga bundnum innlánum, verða því 9,25%.
Nefndin mun gera grein fyrir ákvörðun sinni kl. 9:30 og er hægt að fylgjast með í beinni hér að neðan.
Spá Greiningardeildar Íslandsbanka og Hagfræðideildar Landsbankans, sem birtust í síðustu viku, hljóðaði upp á 25 punkta hækkun.
Konráð S. Guðjónsson, aðalhagfræðingur Arion banka, sagði í gærkvöldi að peningastefnunefnd bankans myndi líklegast hækka stýrivexti um 50 punkta.
Nefndin kom síðast saman í maí og hækkaði þá stýrivexti bankans um 1,25 prósentustig, úr 7,5% í 8,75%. Jafnframt ákvað nefndin þá að hækka fasta bindiskyldu innlánsstofnana úr 1% í 2%.
Fréttin var uppfærð eftir að vaxtahækkun SÍ var gerð opinber.
Vefútsending með kynningu á yfirlýsingu nefndarinnar fer fram klukkan 9:30.
Á kynningunni gera Ásgeir Jónsson, seðlabankastjóri og formaður peningastefnunefndar, Rannveig Sigurðardóttir, varaseðlabankastjóri peningastefnu og staðgengill formanns og Þórarinn G. Pétursson, aðalhagfræðingur Seðlabankans og framkvæmdastjóri sviðs hagfræði og peningastefnu, grein fyrir yfirlýsingu peningastefnunefndar og kynna efni Peningamála.
