Viðsnúningur hefur orðið á gengi úrvalsvísitölunnar OMXI15 en eftir um 3,4% lækkun síðustu tíu dagana í maí hefur vísitalan hækkað um 1,7% síðustu fimm viðskiptadaga.
Vísitalan hækkaði um 0,78% í viðskiptum dagsins og stóð í 2.321,78 stigum við lokun markaða.
Hlutabréfaverð Ölgerðarinnar hækkaði um tæp 3% í 600 milljón króna veltu en gengi Ölgerðarinnar hefur hækkað um 22% á árinu og 47% síðastliðið ár.
Hlutabréfaverð Kviku banka hefur einnig verið á miklu skriði síðustu vikur og hefur gengið hækkað um 12% frá 13. maí. Dagslokagengi Kviku var 15,4 krónur en hlutabréf bankans hafa lækkað um 11% á árinu.
Gengi fasteignafélagsins Kaldalóns hefur síðan hækkað um 17% síðastliðinn mánuð en gengi félagsins fór upp um 2% í 170 milljón króna viðskiptum í dag.
Hlutabréfaverð Haga, sem hefur verið á miklu skriði síðastliðnar vikur, lækkaði um 2% í 332 milljón króna viðskiptum í dag en gengið hefur hækkað um 13% síðastliðinn mánuð.
Mesta veltan var með bréf Marels er gengi fyrirtækisins hækkaði um tæp 2% í 1,2 milljarða króna viðskiptum í dag.
Heildarvelta í Kauphöllinni var 5,1 milljarður.
