Tekist var á um það fyrir dómi í liðinni viku hvort lög standi því í vegi að skaðabótamáli sé beint að ríkinu og Samkeppniseftirlitinu (SKE) þegar málshöfðunarfrestur til ógildingar á stjórnvaldsákvörðun er löngu liðinn.

Skemmst er frá því að segja að þar eru menn ekki á einu máli. Málið sem um ræðir varðar Lyf og heilsu og kaup félagsins á Apóteki Mos. Það hafði verið stofnað árið 2016 en fram að því var eitt apótek í Mosfellsbæ. Tveimur árum síðar ætluðu Lyf og heilsa, sem áttu hitt apótekið í sveitarfélaginu, að taka Apótek Mos yfir en SKE ógilti samrunann.

Var það meðal annars, þó ekki eingöngu, gert á þeim grunni að Mosfellsbær var skilgreindur sem sérstakt markaðssvæði fyrir apótek á grunni neytendakönnunar sem framkvæmd var. Lyf og heilsa næði því markaðsráðandi stöðu í Mosfellsbæ og myndi það skaða samkeppni. Áfrýjunarnefnd samkeppnismála staðfesti þá niðurstöðu.

Umrætt mál nú varðar beiðni Lyfja og heilsu um að fá dómkvaddan matsmann til að leggja mat á hvort framkvæmd téðrar neytendakönnunar standist skoðun. Hefðbundið einkamál hefur ekki verið höfðað en mögulegt er að skaðabótamáli verði stefnt fyrir dóminn komist dómkvaddur matsmaður að þeirri niðurstöðu að pottur hafi verið brotinn við gerð könnunarinnar og þar með mögulega niðurstöðu SKE.

Ennþá tvö í Mosfellsbæ

„Rétt er að muna að umrædd könnun var ekki forsenda niðurstöðu SKE, sem áfrýjunarnefndin staðfesti síðar, heldur lágu einnig til grundvallar sjónarmið lyfsala og upplýsingar frá Sjúkratryggingum Íslands,“ sagði Gizur Bergsteinsson, lögmaður SKE í málinu, í ræðu sinni.

Umbeðin matsgerð væri augljóslega tilgangslaus varðandi úrlausn um mögulega skaðabótakröfu enda væri í matsbeiðninni ekki að finna neinn rökstuðning fyrir því að málsmeðferð eða rannsókn SKE hefði valdið Lyfjum og heilsu tjóni. Í síðari ræðu sinni benti Gizur á að enn þá væru tvö apótek í Mosfellsbæ og þau væru í eigu hvor síns aðilans. „Er staðan sumsé enn þá sú að slagur er um landfræðileg lyfsöluleyfi eins og var um miðja síðustu öld?“ spurði Ástráður Haraldsson, dómari málsins, þá glettinn.

Einar Karl Hallvarðsson ríkislögmaður mótmælti því að beiðnin næði fram að ganga. Benti hann á að aðilar málsins hefðu getað höfðað dómsmál til að hnekkja niðurstöðu SKE og áfrýjunarnefndarinnar. Það hefði aftur á móti ekki verið gert heldur hefði seljandi fallið frá sölunni og selt Apótek Mos til Lyfju. Frestur til slíkrar málshöfðunar væri sex mánuðir og væri hann löngu liðinn nú. Gizur hafði tekið í svipaðan streng í sinni ræðu og bent á að samrunaaðilar gætu sjálfum sér um kennt að hafa samið um að falla mætti frá honum, ef babb kæmi í bátinn, í stað þess að taka málið alla leið.

Nánar er fjallað um málið í Viðskiptablaðinu. Áskrifendur geta nálgast blaðið undir Tölublöð , aðrir geta skráð sig í áskrift hér .