Hlutabréfaverð fjölmiðla- og fjarskiptafyrirtækisins Sýnar hefur lækkað um rúm 33,5% á árinu og hefur markaðsvirði félagsins farið niður um tæplega 2,7 milljarða.
Dagslokagengi Sýnar á síðasta viðskiptadegi ársins 2024 var 32,2 krónur og var markaðsvirði fjölmiðla- og fjarskiptafélagsins um 8 milljarðar.
Hlutabréfaverð félagsins lokaði í 21,4 krónum í dag eftir um tæplega 8% lækkun í 79 milljóna viðskiptum. Markaðsvirði félagsins miðað við núverandi gengi er 5,3 milljarðar.
Ef tíu stærstu hluthafar Sýnar eru skoðaðir miðað við upplýsingar um eignarhluti þeirra í janúarmánuði hefur virði eignarhlutar Gavia Invest ehf., sem er stærsti hluthafi Sýnar, rýrnað um 487,6 milljónir á árinu.
Gavia keypti hlutabréf í Sýn fyrir 60 milljónir króna í lok síðasta árs. Félagið keypti 2 milljónir hluta á genginu 30,0 krónur á hlut.
Eftir viðskiptin átti Gavia 45.147.128 hluti, eða um 18,2% eignarhlut í Sýn.
Markaðsvirði eignarhlutar Gavia í Sýn var tæplega 1,5 milljarður í ársbyrjun. Núverandi markaðsvirði er 966 milljónir króna.
Hákon Stefánsson stjórnarformaður Sýnar og Ragnar Páll Dyer, stjórnarmaður í Sýn, sitja báðir í stjórn Gavia.
Þeir starfa báðir sem framkvæmdastjórar hjá fjárfestingarfélaginu InfoCapital sem á 80,7% hlut í Gavia. InfoCapital er í 97% eigu Reynis Grétarssonar, stofnanda og fyrrverandi forstjóra CreditInfo.
Hlutabréfaverð Alvotech hækkaði um 3,5% í viðskiptum dagsins og var daglokagengi líftæknilyfjafélagsins 1.715 krónur.
Hlutabréfaverð Icelandair hækkaði um rúm 2% og lokaði 1,34 krónum eftir um 160 milljón króna viðskipti.
OMXI15 úrvalsvísitalan hækkaði um 0,25% og var heildarvelta á markaði 2,3 milljarðar.
