Helstu hlutabréfavísitölur Bandaríkjanna hafa hækkað verulega á fyrstu fimm mánuðum ársins og stendur S&P 500 vísitalan í sögulegum hæðum.
Afkomuspár skráðra fyrirtækja og árshlutauppgjör hafa hingað til verið afar jákvæð og eru greiningaraðilar byrjaðir að færa upp spár sínar fyrir árið upp á við.
Á síðustu tveimur vikum hafa greiningardeildir Bank of America, BMO Capital Markets og Deutsche bank fært m.a. spár sínar fyrir gengi S&P 500 verulega upp.
Úrvalsvísitalan stendur í 5.304 stigum eftir um 12% hækkun á árinu en að mati BMO Capital markets mun vísitalan fara yfir 5.600 stig fyrir árslok.
Yfirmaður fjárfestinga hjá BMO, Brian Belski, segir í samtali við Yahoo Finance að í þeirra spá er gert fyrir um tveimur vaxtalækkunum á árinu sem er í samræmi við flestar núverandi vaxtaspár.
„Okkur varð ljóst snemma á árinu að við vanmátum styrk markaðarins sér í lagi í vegna að núna eru væntingar fjárfesta og tilmæli Seðlabankans að fylgjast að en svo var ekki í byrjun árs,“ skrifar Belski í greiningu BMO.
„Núverandi umhverfi er það sem bolar hafa verið að vonast eftir,“ segir Ohsung Kwon, verðbréfasérfræðingur hjá Bank of America í samtali við Yahoo Finance.
Í byrjun árs voru greiningardeildir vestanhafs á því að afkoma fyrirtækja á fyrsta fjórðungi myndi hafa mikil áhrif á markaðinn. Það reyndist svosem rétt en hagnaður fyrirtækja í S&P 500 jókst um 6% á milli ára og hefur ekki aukist jafn mikið milli ára síðustu tvö ár.
Binky Chadha, yfirmaður verðbréfadeildar Deutsche Bank, telur að afkoma fyrirtækja í S&P 500 muni halda áfram að koma á óvart með árinu en Deutsche bank býst við því að vísitalan endi árið í að minnsta kosti 5.500 stigum. Mun það vera töluverð hækkun úr 5.100 stiga spá bankans í ársbyrjun.
Chadha telur enn töluvert svigrúm fyrir frekari hækkanir á hlutabréfamarkaði en ef framleiðni heldur áfram að vextir lækka útilokar hann ekki S&P 500 vísitalan fari yfir 6.000 stigin.
