Berkshire Hathaway, fjárfestingafélag Warren Buffet, minnkaði hlut sinn í Apple um 1% á síðustu þremur mánuðum ársins 2023.
Félagið á enn 5,9% hlut í Apple samkvæmt skráningu hjá verðbréfaeftirliti Bandaríkjanna en virði hlutarins er um 167 milljarðar Bandaríkjadala á gengi gærdagsins, sem samsvarar rúmum 23 þúsund milljörðum íslenskra króna á gengi dagsins.
Samkvæmt The Wall Street Journaler Buffet að minnka við sig vegna þess að vægi Apple í 300 milljarða dala hlutabréfasafni félagsins væri orðið of mikið.
Hlutabréf í Apple hafa hækkað um 367% frá árinu 2018 og hrósaði Buffet félaginu á síðasta hluthafafundi Berkshire er hann sagði Apple einfaldlega vera betra fyrirtæki en mörg þeirra í eignasafni fjárfestingafélagsins.
Fylgist náið með næstu skrefum Buffet
Hlutabréf í Apple hafa þó ekki byrjað árið 2024 af sama krafti en Microsoft hirti krúnuna sem verðmætasta fyrirtæki Bandaríkjanna fyrr á árinu á meðan vandræði Apple í Kína hafa haldið áfram að vaxa.
Hlutabréf í Apple hafa lækkað um 4% á árinu og féll gengið um 0,9% í utanþingsviðskiptum.
Steven Check, fjárfestingastjóri Check Capital Management sem á meðal annars bréf í Berkshire, segist ætla fylgjast náið með næstu skrefum sjóðsins í tengslum við Apple.
„Þetta virðist vera svo lítil sala. Ég myndi halda að þeir selji meiri af bréfum,“ segir Check í samtali við WSJ.
