Kristinn Már Gunnarsson, stofnandi tansaníska námufélagsins Baridi Group, er í ítarlegu viðtali í Viðskiptablaði vikunnar þar sem hann rekur sögu félagsins og tengsl sín við Tansaníu. Kristinn þekkir vel til landsins en hann bjó í Tansaníu sem unglingur.
Tansanía er land í Austur-Afríku með hátt í 70 milljónir íbúa en mannsfjöldinn hefur ríflega tvöfaldast frá aldamótum. Tansanía er 30. stærsta land heims og er sem dæmi nærri þrefalt stærra en Þýskaland.
Tansanía er fátækt land á alþjóðlega mælikvarða. Verg landsframleiðsla á mann er um 1,28 þúsund dalir en á grundvelli kaupmáttarjöfnuðar (PPP) er VLF á mann tæplega 95% minni en á Íslandi og 76% minni en meðaltalið í flokki nýmarkaðs- og þróunarlanda.
Baridi, sem var stofnað árið 2022, leggur mikið upp úr því að skapa gott starfsumhverfi og hafa jákvæð áhrif á tansanískt samfélag. Kristinn og Baridi hafa m.a. í gegnum Baridi Future Foundation byggt skóla á æskuslóðum Kristins.
„Við erum búin að byggja heimavistarskóla í Iringa-héraði fyrir 400 krakka, fyrir ríflega 300 stúlkur og 100 stráka, frá sjöunda bekk og upp í stúdentspróf.
Í Iringa er skólaskylda upp í sjöunda bekk en í kjölfarið hætta um 80% af stelpum í skóla, m.a. út af gömlum venjum, þær eru látnar sjá um yngri systkini, vinna sem húshjálp, undirbúa sig fyrir giftingu eða annað. Þetta er ákveðið vandamál.“
Auk þess eru samtökin með smíðaverkstæði þar sem Kristinn kennir strákum að smíða. Dóttir hans er búin að koma upp saumastofu, þar sem stelpum er kennt að sauma kjóla, og kaldpressu sem nýtt er til þess að vinna kókosolíu og olíu og þara.
Samtökin fengu verðlaun frá forseta Tansaníu fyrr í ár fyrir að skapa langtímastörf fyrir konur í landinu.
7% auðlindagjald
Kristinn telur auk þess að jarðefnaiðnaðurinn geti reynst afar mikilvægur fyrir efnahag Tansaníu og skapað atvinnu fyrir ungt fólk.
„Ef þetta er gert rétt er þetta ótrúlegur peningur sem á eftir að skila sér til landsins og til landsmanna.“
Kristinn segir landið búa vel að því að þegar Tansanía varð sjálfstætt ríki í byrjun sjöunda áratugarins ákváðu ráðamenn að takmarka námuvinnslu. Jafnframt var tryggt að landið yrði í eigu almennings. Tansanía hafi því betri sögu að segja en mörg nágrannalönd þegar kemur að auðlindanýtingu.
„Þetta er eina Afríkulandið sem er búið að setja upp nákvæmt kerfi fyrir námuvinnslu, hvernig maður á að taka málma úr jörðunni, vinna þá, hvaða skatta og gjöld þú átt að borga og annað. Við borgum 7% auðlindagjald sem er t.d. mun dýrara en í Kongó, landinu við hliðina á okkur.“
Fréttin er hluti af ítarlegu viðtali við Kristin um námuverkefnið í Tansaníu í Viðskiptablaði vikunnar.
