Capi­tal Group selur í Ís­lands­banka fyrir hátt í 900 milljónir

Bandaríska sjóðastýringafélagið Capital Group hefur selt 0,35% hlut í Íslandsbanka á undanförnum dögum, samkvæmt uppfærðum lista yfir stærstu hluthafa bankans. Miðað við meðalgengi Íslandsbanka í febrúar má ætla að Capital Group hafi selt fyrir hátt í 900 milljónir króna.

Um er að ræða fyrstu sölu Capital Group frá því í ágúst þegar eignarhlutur félagsins fór undir 5%. Svo virðist sem salan hafi farið fram í kjölfar þess að tilkynnt var um stjórn Kviku hefði óskað eftir samrunaviðræðum við stjórn Íslandsbanka í byrjun mánaðarins. Hlutabréfaverð Íslandsbanka hefur hækkað um meira en 7% frá því að tilkynningin var send út.

Capital Group er áfram fimmti stærsti hluthafi Íslandsbanka og stærsti erlendi hluthafi bankans. Sjóðir í stýringu Capital Group eiga nú samtals 4,54% hlut að markaðsvirði 11,4 milljarðar króna.

Capital Group, sem er eitt stærsta eignastýringarfélag í heimi, var meðal hornsteinsfjárfesta í frumútboði Íslandsbanka í júní 2021. Eftir útboðið áttu sjóðir í stýringu félagsins samtals 3,85% hlut í bankanum. Í kjölfar seinna útboðs Bankasýslu ríkisins í mars 2022 átti Capital Group 5,07% hlut í Íslandsbanka.