Coloplast kaupir Kerecis á 175 milljarða

Danska fyrirtækið Coloplast hefur náð samkomulagi um kaup á íslenska lækningavörufyrirtækinu Kerecis fyrir 1,3 milljarða dala, eða sem nemur tæplega 175 milljörðum króna. Bróðurparturinn af kaupverðinu, eða 1,2 milljarðar dala, verður greiddur með handbæru fé.

Í tilkynningu Coloplast segir að 77% af hluthöfum Kerecis hafi samþykkt yfirtökutilboðið.

Eins og Viðskiptablaðið greindi frá í gær var hávær orðrómur er á sveimi á íslenskum fjármálamarkaði um að búið væri að semja um sölu á íslenska lækningavörufyrirtækinu Kerecis til erlends fyrirtækis fyrir upp undir 160 milljarða króna.

Tryggingafélögin Sjóvá og VÍS staðfestu svo að yfirtökutilboð hefði borist í Kerecis í gærkvöldi.

Kerecis, sem framleiðir sáraroð úr þorski á Ísafirði, lauk 60 milljóna dala hlutafjárútboði, eða sem nam um 8 milljörðum króna, fyrir rúmu ári síðan. Í útboðinu lagði Kirkbi, fjárfestingafélag Kristiansen-fjölskyldunnar, aðaleigenda Lego, til 40 milljónir dollara og eignaðist 6,8% hlut í Kerecis.

Fjármögnunin miðaði við að Kerecis væri 620 milljóna dollara virði, nærri 90 milljörðum króna. Útboðsgengið í hlutafjárútboðinu var 78,19 dalir á hlut. Virði félagsins hefur miðað við yfirtökutilboð Coloplast því nærri tvöfaldast á um einu ári.