Stjórnskipunar- og eftirlitsnefnd Alþingis mun halda opinn fund næstkomandi mánudag til að fjalla um ákvörðun fjármála- og efnahagsráðherra um að krefjast ekki endurgreiðslu framlaga til stjórnmálasamtaka. Daði Már Kristófersson fjármálaráðherra verður til svara á fundinum, sem er opinn öllum og verður streymt á vefsíðu Alþingis.
Tilkynnt var fyrr í vikunni að fjármálaráðherra hafi farið þess á leit við Ríkisendurskoðun að hún kanni og leggi mat á stjórnsýslulega framkvæmd og úrvinnslu ráðuneytisins vegna verklags í tengslum við málið.
Greint var frá því í byrjun mánaðar að fjármála- og efnahagsráðuneytið myndi ekki krefja flokka sem voru ekki skráðir sem stjórnmálasamtök um endurgreiðslu framlaga frá ríkinu. Hafði þá verið greint frá því að Flokkur fólksins hafi þegið alls 240 milljónir króna í styrk, þrátt fyrir að hafa verið skráður sem félagasamtök en ekki stjórnmálasamtök líkt og lög kveða á um.
Fjármálaráðuneytið sagðist hafa brugðist leiðbeiningarskyldu gagnvart stjórnmálasamtökum við úthlutun fjármuna og að óheimilt væri að afturkalla ákvarðanir eða krefjast endurgreiðslu.
Skilyrði umskráningu í stjórnmálasamtakaskrá var bætt við lögin árið 2022 og voru framlög greidd í janúar 2022-2025. Fleiri flokkar uppfylltu ekki skilyrðin árið 2022 en breyttu flest skráningu skömmu eftir breytinguna. Sósíalistaflokkurinn breytti þó ekki skráningu fyrr en í nóvemner 2023 og Vinstri græn ekki fyrr en í september 2024. Flokkur flokksins var enn skráður sem félagasamtök þegar málið kom upp.
Viðbrögðin við fyrri ákvörðun ráðherrans voru misjöfn. Arnar Þór Stefánsson, hæstaréttarlögmaður hjá LEX, sagði til að mynda í samtali við Viðskiptablaðið að ríkið ætti skýra endurgreiðslukröfu á stjórnmálaflokka sem uppfylltu ekki skilyrði um skráningu í stjórnmálasamtakaskrá en fengu engu síðar styrki frá ríkissjóði. Taldi hann að utanaðkomandi álit sem ráðuneytið aflaði sér fyrir ákvörðunina stæðist ekki skoðun en skýrar lagareglur um ábyrgð viðtakenda fjárins hafi þar verið sniðgengnar.
